சென்னை, 20 மார்ச் (ஹி.ச.)

சமீப காலமாக தொழில்நுட்ப உலகில் புயலைப் போல பரவியிருந்த செயற்கை நுண்ணறிவு (ஏஐ) மீதான ஈர்ப்பு, தற்போது 2026-ல் ஒரு தெளிவான நிலைக்கு வந்துள்ளது.

ஆகவே, உலகளாவிய தொழில்நுட்ப நிபுணர்கள் இந்த ஆண்டை ஏஐ-யின் உண்மை வெளிப்படும் ஆண்டு என்று குறிப்பிடுகின்றனர்.

2023 மற்றும் 2024-ம் ஆண்டுகளில் ஏஐ ஒரு மாயாஜாலக்கோல் போல கருதப்பட்டது. ஆனால், 2026-ல் அந்த எண்ணங்கள் மறைந்து, உண்மை உலக பயன்பாடுகள், லாப-நஷ்டக் கணக்குகள் மற்றும் சட்ட சிக்கல்களை ஏஐ நேரடியாக எதிர்கொள்கிறது.

ஏன் 2026-ம் ஆண்டை ஏஐ-யின் உண்மை வெளிப்படும் ஆண்டு என்று சொல்கிறார்கள்? அதற்கான காரணங்கள் என்ன?

1. கடந்த சில வருடங்களில் கூகுள், மைக்ரோசாஃப்ட், ஓபன் ஏ.ஐ போன்ற நிறுவனங்கள் ஏஐ-க்காக நிறைய பணம் செலவு செய்தன. முதலீடு செய்தவர்கள், இந்த தொழில்நுட்பம் நமக்கு எந்த அளவுக்கு லாபம் தரும்? என்ற கேள்வியை கேட்க ஆரம்பித்தனர்.

வெறும் வியக்க வைக்கும் வீடியோக்கள், படங்கள் மற்றும் கவிதைகளை உருவாக்கும் ஏஐ-க்கு பதிலாக, நிறுவனங்களின் செலவுகளை குறைத்து, விற்பனையை அதிகரிக்கும் பயனுள்ள ஏஐ மாடல்களுக்கு இப்போது சந்தையில் மதிப்பு உள்ளது.

2. ஏஐ-யால் உருவாக்கப்பட்ட தவறான வீடியோக்கள் மற்றும் பொய்யான செய்திகளால் உலக அரசியல் மற்றும் சமூகத்தில் பல குழப்பங்கள் உண்டாயின. ஐரோப்பிய ஒன்றியத்தின் ஏஐ சட்டம் போன்ற கடுமையான சட்டங்கள் தற்போது முழுமையாக நடைமுறைக்கு வந்துள்ளன.

இனிமேல் ஏஐ நிறுவனங்கள் தாங்களாகவே இணையத்தில் உள்ள யாருடைய எழுத்து, ஓவியம் அல்லது குரலைத் திருடி தங்கள் ஏஐ-க்கு பயிற்சி கொடுக்க முடியாது. காப்புரிமை வழக்குகள் மூலம் ஏஐ நிறுவனங்கள் அதிக நஷ்டங்களை சந்திக்க ஆரம்பித்துள்ளன. இது ஏஐ-க்கான ஒரு பெரிய உண்மை நிலை ஆகும்.

3. ஏஐ வந்துவிட்டால் மனிதர்களுக்கு வேலையே இருக்காது’ என்ற பயம் முன்பு இருந்தது. ஆனால், 2026-ல் மனிதர்களின் வேலையை ஏஐ முழுமையாக எடுக்கவில்லை என்பது உறுதியாகியுள்ளது. மாறாக, இது ஒரு உதவியாளராகவே செயல்படுகிறது.

ஏஐ மனிதர்களை வேலையிலிருந்து நீக்காது; ஆனால் ஏஐ-ஐ பயன்படுத்தத் தெரிந்த மனிதன், அதைத் தெரியாத மனிதனை விட முன்னேறுவான்’ என்ற உண்மை இப்போது உண்மையாகிவிட்டது.

4. ஏஐ-க்கான தரவு மையங்களை (Data Centers) இயக்குவதற்கு அதிகப்படியான மின்சாரமும், இயந்திரங்களை குளிர்விக்க நிறைய தண்ணீரும் தேவைப்படுகிறது.

ஏஐ-யின் வளர்ச்சிக்கு அதன் அறிவு ஒரு தடையாக இல்லை. அதை இயக்குவதற்கான மின்சாரமும் தண்ணீரும்தான் இப்போது பெரிய பிரச்சனையாக உள்ளன. அதனால், அதிக சக்தியை பயன்படுத்தும் பெரிய ஏஐ மாடல்களை விட, குறிப்பிட்ட வேலைகளை மட்டும் சிறப்பாகச் செய்யும் சிறிய மொழி மாடல்கள் இப்போது பிரபலமாகி வருகின்றன.

5. ஏஐ சில நேரங்களில் உறுதியாக தவறான தகவல்களைக் கொடுக்கும். ஆரம்பத்தில் இது வேடிக்கையாக பார்க்கப்பட்டாலும், மருத்துவம் மற்றும் சட்டத் துறைகளில் இது பெரிய ஆபத்தை ஏற்படுத்தியது.

2026-ல் நிறுவனங்கள் 99% சரியான பதில்களைத் தரும் ஏஐ-யை மட்டுமே நம்புகின்றன. எல்லாவற்றையும் தெரிந்த ஏஐ என்பதை விட, தவறு செய்யாத பாதுகாப்பான ஏஐ என்பதே இந்த ஆண்டின் முக்கிய குறிக்கோள்.

நாம் இப்போது இருக்கும் 2026-ம் ஆண்டு ஏஐ-யின் வீழ்ச்சி கிடையாது. இது ஏஐ முதிர்ச்சியடையும் வருடம். ஆரம்பத்தில் இருந்த ஆச்சரியங்கள் முடிந்து, ஏஐ என்பது இணையம் அல்லது மின்சாரத்தைப் போல நமது அன்றாட வாழ்க்கையின் ஒரு சாதாரணமான, முக்கியமான தொழில்நுட்பமாக மாறத் தொடங்கியுள்ள வருடம் இது.

கடைசியாக, இது நமக்கு உணர்த்தும் பாடம் ஒன்றுதான். ஏஐ என்பது மனிதர்களுக்கு பதிலாக வரவில்லை. மனிதர்களின் திறனை அதிகரிக்கவே வந்துள்ளது.

இந்த உண்மையை ஏற்றுக்கொண்டு, நல்ல விஷயங்களுக்கு பயன்படுத்தி இந்த தொழில்நுட்பத்துடன் சேர்ந்து பயணிப்போம்.

Hindusthan Samachar / JANAKI RAM