மும்பை, 22 மார்ச் (ஹி.ச.)

உள்நாட்டு விமானக் கட்டணங்களுக்கான தற்காலிக உச்சவரம்புகளை மார்ச் 23 முதல் நீக்க தீர்மானித்துள்ளதாக சிவில் விமானப் போக்குவரத்து அமைச்சகம் அறிவித்துள்ளது.

விமானப் போக்குவரத்து சந்தையில் ஏற்பட்ட ஏற்ற இறக்கங்களை கட்டுப்படுத்த பல மாதங்களுக்கு முன்பு அறிமுகப்படுத்தப்பட்ட விலைக் கட்டுப்பாட்டு முறைக்கு இதன் மூலம் முற்றுப்புள்ளி வைக்கப்படுகிறது.

தற்போதைய சூழலில் பயணச்சீட்டு விலைகளுக்கு விதிக்கப்பட்ட கட்டுப்பாடுகள் இனி அவசியமில்லை என்று அமைச்சகம் வெளியிட்டுள்ள அதிகாரப்பூர்வ உத்தரவில் குறிப்பிடப்பட்டுள்ளது.

இந்த நிலையில் உள்நாட்டு விமானக் கட்டண உச்சவரம்பை நீக்கும் அரசின் முடிவு சாமானிய பயணிகளுக்கு பாதிப்பை ஏற்படுத்தும் என்று இந்திய விமானிகள் கூட்டமைப்பு தலைவர் கேப்டன் சரண்வீர் சிங் ரந்தாவா எச்சரித்துள்ளார்.

இது குறித்து இன்று செய்தியாளர்களிடம் அவர் கூறுகையில்,

உள்நாட்டு விமானக் கட்டண உச்சவரம்பை நீக்கும் அரசின் முடிவால் பயணச்சீட்டு விலைகள் கணிசமாக உயரக்கூடும். குறிப்பாக நடுத்தர மற்றும் குறைந்த வருமானம் கொண்ட பயணிகள் அதிகளவில் பாதிக்கப்பட வாய்ப்புள்ளது.

மேலும், பயணிகள் நெரிசல் அதிகமாக இருக்கும் காலங்களில் விமான நிறுவனங்கள் கட்டணங்களை திடீரென உயர்த்தும் சாத்தியம் உள்ளது. இதனால் பொதுமக்கள் மீது கூடுதல் சுமை ஏற்படும்.

கட்டண உச்சவரம்பை நீக்குவதற்குப் பதிலாக, விமானப் பயணத்தை பொதுமக்களுக்கு எளிமையாகவும் மலிவாகவும் மாற்றுவதில் அரசு கவனம் செலுத்த வேண்டும்.

அரசின் தற்போதைய கொள்கை நடவடிக்கைகளில் முரண்பாடுகள் உள்ளன. செலவுகளை குறைப்பதைக் குறிக்கோளாகக் கொண்ட ஒரு நடவடிக்கையுடன், உச்சவரம்பை நீக்கும் முடிவு முரணாக உள்ளது. இது முன் எடுக்கப்பட்ட முயற்சிகளின் பயனை குறைக்கக்கூடும்.

இந்த முடிவை மறுபரிசீலனை செய்ய வேண்டும். குறிப்பாக அதிக தேவை காணப்படும் காலங்களில் விமானக் கட்டணங்கள் கட்டுப்பாட்டுக்குள் இருப்பதை உறுதி செய்ய வேண்டும்.

இவ்வாறு அவர் கூறினார்.

Hindusthan Samachar / vidya.b