புதுடெல்லி, 29 மார்ச் (ஹி.ச.)

டெல்லி குற்றப்பிரிவு கிழக்கு மண்டலம்–I அதிகாரிகள் கைபேசி திருட்டு கும்பலிடமிருந்து இன்று 83 திருட்டு கைபேசிகளை மீட்டுள்ளனர்.

யமுனா விஹாரை தளமாகக் கொண்டு செயல்பட்டு வந்த இந்த கும்பல், திருடப்பட்ட கைபேசிகளை மேற்கு வங்கம் வழியாக பங்களாதேஷுக்கு கடத்தி வந்தது விசாரணையில் தெரியவந்துள்ளது.

கைபேசிகளை அனுப்புவதற்காக பொட்டலமாக தயாரித்து கொண்டிருந்த வேளையில், இரண்டு சந்தேகநபர்கள் கையும் களவுமாக பிடிபட்டனர்.

இச்சரக்குகள் கூரியர் சேவையின் மூலம் சட்டவிரோதமாக பங்களாதேஷுக்கு அனுப்பப்படவிருந்தன என்பதும் முதற்கட்ட விசாரணையில் உறுதியாகியுள்ளது.

இது தொடர்பாக கிடைத்த ரகசிய தகவலின் அடிப்படையில், குற்றப்பிரிவு சிறப்பு குழு யமுனா விஹாரில் வாடகைக்கு எடுக்கப்பட்டிருந்த இடத்தில் துல்லியமான சோதனை நடவடிக்கையை மேற்கொண்டது.

தகவலை உறுதிப்படுத்திய பின்னர், மோமின் சௌக் அருகிலுள்ள பி-42, கலி எண் 13 என்ற முகவரியில் அமைந்திருந்த வீட்டில் அதிகாரிகள் திடீர் சோதனை நடத்தினர்.

கூட்ட நெரிசல் ஏற்படும் அபாயம் இருந்தபோதிலும், அதிகாரிகள் திறமையாக செயல்பட்டு, குற்றச்செயல் நடைபெற்றதாகக் கூறப்படும் மூன்றாவது மாடியை அடைந்தனர். அங்கு பல்வேறு நிறுவனங்களைச் சேர்ந்த 83 திருடப்பட்ட கைபேசிகள் அடங்கிய சீல் செய்யப்பட்ட அட்டைப்பெட்டி பறிமுதல் செய்யப்பட்டது.

விசாரணையின் போது, ‘டேனிஷ்’ என மட்டும் அடையாளம் காணப்பட்ட ஒருவரிடமிருந்து இந்த கைபேசிகள் பெறப்பட்டதாக குற்றம் சாட்டப்பட்டவர் தெரிவித்தார்.

இந்தச் சம்பவம் தொடர்பான விசாரணை தொடர்ந்து நடைபெற்று வருகிறது.

Hindusthan Samachar / vidya.b