புதுடெல்லி, 13 ஏப்ரல் (ஹி.ச)

ஒவ்வொரு ஆண்டும் ஏப்ரல் மாதத்தில் இந்திய வானிலை ஆய்வு மையம் முதற்கட்ட நீண்டகால முன்னறிவிப்பையும், மே மாத இறுதியில் புதுப்பிக்கப்பட்ட இரண்டாம் கட்ட முன்னறிவிப்பையும் வெளியிடுவது வழக்கம்.

அந்த வகையில் 2026-ஆம் ஆண்டுக்கான தென்மேற்கு பருவமழையின் நீண்டகால முன்னறிவிப்பை இந்திய வானிலை ஆய்வு மையம் (IMD) இன்று மாலை வெளியிடுகிறது.

புதுடெல்லியில் உள்ள புவி அறிவியல் அமைச்சக வளாகத்தில், லோதி சாலையில் அமைந்துள்ள ‘மகிகா ஹால்’ அரங்கில் இன்று பிற்பகல் 4.00 மணிக்கு இதற்கான செய்தியாளர் சந்திப்பு நடைபெறுகிறது.

இந்த செய்தியாளர் சந்திப்பில் புவி அறிவியல் அமைச்சகத்தின் செயலாளர் முனைவர் எம். ரவிச்சந்திரன் முன்னிலை வகித்து உரையாற்றுகிறார்.

அவருடன் இந்திய வானிலை ஆய்வு மையத்தின் வானிலை இயக்குநர் ஜெனரல் முனைவர் எம். மொஹபத்ரா உள்ளிட்ட உயர் அதிகாரிகளும் கலந்துகொள்கின்றனர்.

2026 ஜூன் முதல் செப்டம்பர் வரையிலான நான்கு மாத காலப்பகுதியில் நாடு முழுவதும் பெய்யக்கூடிய தென்மேற்கு பருவமழையின் அளவு குறித்த முதற்கட்ட நீண்டகால முன்னறிவிப்பு இந்த சந்திப்பில் வெளியிடப்படும்.

நாட்டின் வேளாண் உற்பத்தி, நீர் மேலாண்மை மற்றும் பொருளாதாரத் திட்டமிடலுக்கு இது முக்கியமானதாக கருதப்படுகிறது.

நாட்டின் மொத்த ஆண்டு மழைப்பொழிவில் சுமார் 75% தென்மேற்கு பருவமழை காலத்தில்தான் கிடைக்கிறது. காரீஃப் பயிர் சாகுபடி முழுமையாக இந்த பருவமழையை நம்பியே உள்ளது.

இந்த முன்னறிவிப்பு விவசாயிகள், கொள்கை வகுப்பாளர்கள் மற்றும் பொதுமக்கள் மத்தியில் அதிக எதிர்பார்ப்பை ஏற்படுத்தியுள்ளது.

முன்னறிவிப்பு விவரங்கள் இன்று மாலை வெளியான பின்னர் இந்திய வானிலை ஆய்வு மையத்தின் அதிகாரப்பூர்வ இணையதளத்திலும் வெளியிடப்படும் என எதிர்பார்க்கப்படுகிறது.

Hindusthan Samachar / vidya.b