புதுடெல்லி, 17 ஏப்ரல் (ஹி.ச)

லோக்சபாவில் இன்று, நாடாளுமன்றம் மற்றும் மாநில சட்டப்பேரவைகளில் பெண்களுக்கு 33 சதவீத இடஒதுக்கீடு வழங்கும் அரசியலமைப்பு (131-வது திருத்த) மசோதா, 2026 மீதான விவாதம் தொடர்ந்து வாக்கெடுப்பு நடைபெற உள்ளது.

இதனுடன், டெல்லி மற்றும் ஜம்மு-காஷ்மீர் யூனியன் பிரதேசங்களுக்கு இந்த இடஒதுக்கீட்டை நீட்டிக்கும் யூனியன் பிரதேச சட்டங்கள் (திருத்த) மசோதா, 2026 மற்றும் மக்களவைத் தொகுதிகளின் எண்ணிக்கையை 850-ஆக உயர்த்தி மறுவரையறை செய்ய வகைசெய்யும் தொகுதி மறுவரையறை மசோதா ஆகியவையும் பரிசீலிக்கப்படவுள்ளன.

அலுவல் பட்டியலின்படி, இந்த மூன்று மசோதாக்களும் ஒன்றாக விவாதத்திற்கு எடுத்துக்கொள்ளப்படும். மத்திய சட்டம் மற்றும் நீதித்துறை அமைச்சர் அர்ஜுன் ராம் மேக்வால் மற்றும் மத்திய உள்துறை அமைச்சர் அமித் ஷா ஆகியோர் மகளிர் இடஒதுக்கீடு மசோதா மற்றும் தொகுதி மறுவரையறை மசோதாவின் திருத்தங்களை நிறைவேற்ற முன்மொழிவர் என எதிர்பார்க்கப்படுகிறது.

நேற்று, மக்கள்தொகை கணக்கெடுப்புக்குப் பின்னரே அமல்படுத்த வேண்டும் என்ற நிபந்தனையை நீக்கும் மகளிர் இடஒதுக்கீடு மசோதா திருத்தங்கள் மீது லோக்சபாவில் 12 மணி நேர விவாதம் நடைபெற்றது.

இறுதி வாக்கெடுப்பில் 333 வாக்குகளில் 251 ஆதரவாகவும் 185 எதிராகவும் பதிவாகின. இதையடுத்து, அரசியலமைப்பு (131-வது திருத்த) மசோதா, 2026 மற்றும் தொகுதி மறுவரையறை மசோதா, 2026 ஆகிய மூன்று மசோதாக்களும் லோக்சபாவில் அறிமுகப்படுத்தப்பட்டன.

விவாதத்தில் பிரதமர் நரேந்திர மோடி, உள்துறை அமைச்சர் அமித் ஷா ஆகியோருடன், எதிர்க்கட்சித் தலைவர்களான சமாஜ்வாதி கட்சித் தலைவர் அகிலேஷ் யாதவ், ஏஐஎம்ஐஎம் தலைவர் அசாதுதீன் ஒவைசி, காங்கிரஸ் தலைவர் கே.சி. வேணுகோபால் உள்ளிட்டோர் பங்கேற்றனர்.

அரசியலமைப்பு

(131-வது திருத்த) மசோதா, 2026-ஐ தற்போதைய வடிவில் திரும்பப் பெற்று, ஒருமித்த கருத்தை உருவாக்க அனைத்துக் கட்சிக் கூட்டத்தைக் கூட்டுமாறு காங்கிரஸ் கட்சி அரசை வலியுறுத்தியுள்ளது.

மசோதா தற்போதைய வடிவில் நிறைவேற்றப்பட்டால் தென் மாநிலங்கள் விகிதாசார அடிப்படையில் பாதிக்கப்படும் என திமுக மற்றும் காங்கிரஸ் எதிர்க்கட்சி உறுப்பினர்கள் குற்றம்சாட்டியுள்ளனர்.

Hindusthan Samachar / vidya.b