சென்னை, 17 ஏப்ரல் (ஹி.ச.)

தமிழகத்தில் நடைபெற உள்ள சட்டமன்றத் தேர்தலை முன்னிட்டு, பணியில் ஈடுபடும் காவல்துறை அதிகாரிகள் மற்றும் போலீஸ் பணியாளர்கள் தங்களது வாக்குரிமையை பயன்படுத்துவதற்காக தபால் ஓட்டு (Postal Ballot) பதிவு செய்யும் நடவடிக்கைகள் தீவிரமாக மேற்கொள்ளப்பட்டுள்ளன.

இதன்படி, சென்னையில் பணியாற்றும் காவல்துறையினருக்காக ஏப்ரல் 18 மற்றும் 20 ஆகிய தேதிகளில் தபால் ஓட்டு பதிவு செய்ய சிறப்பு முகாம்கள் நடத்தப்பட உள்ளன. தேர்தல் பணியில் ஈடுபட வேண்டியதால், நேரடியாக வாக்குச்சாவடிகளில் வாக்களிக்க முடியாத காவலர்களுக்கு இந்த ஏற்பாடு செய்யப்பட்டுள்ளது.

இந்த முகாம்களில், முன்பதிவு செய்துள்ள காவலர்கள் மட்டுமே கலந்து கொண்டு தங்களது வாக்குகளை பதிவு செய்யலாம் என அறிவுறுத்தப்பட்டுள்ளது. மேலும், அடையாள ஆவணங்கள் கட்டாயம் கொண்டு வர வேண்டும் என்றும் தெரிவிக்கப்பட்டுள்ளது.

தபால் ஓட்டு பதிவு செயல்முறைகள் வெளிப்படைத்தன்மையுடன் நடைபெற தேர்தல் அதிகாரிகள், கண்காணிப்புப் பணியாளர்கள் உள்ளிட்டோர் நியமிக்கப்பட்டுள்ளனர். பாதுகாப்பு ஏற்பாடுகளும் பலப்படுத்தப்பட்டுள்ளன.

சென்னையில் மட்டும் ஆயிரக்கணக்கான காவலர்கள் தேர்தல் பணியில் ஈடுபட உள்ளதால், அவர்களுக்கான வாக்குரிமையை உறுதி செய்ய இந்த நடவடிக்கை முக்கியமானதாக பார்க்கப்படுகிறது.

தேர்தல் ஆணையம் சார்பில், தபால் ஓட்டுகள் முறையாக சேகரிக்கப்பட்டு பாதுகாப்பாக வாக்கு எண்ணும் மையங்களுக்கு அனுப்பப்படும் என்றும் அதிகாரிகள் தெரிவித்துள்ளனர்.

Hindusthan Samachar / VINOTH KUMAR P