வெலிங்டன், 19 ஏப்ரல் (ஹி.ச.)

நியூசிலாந்தின் தலைநகரான வெலிங்டன், வடக்கு தீவில் பெய்த கனமழையைத் தொடர்ந்து ஏற்பட்ட திடீர் வெள்ளத்தின் பாதிப்புகளிலிருந்து மீள முடியாமல் தத்தளித்து வருகிறது.

ஹட் நகர சபை உள்ளிட்ட உள்ளூர் அதிகாரிகள், நகரின் பல பகுதிகளில் வெள்ள சேதம் ஏற்பட்டுள்ளதை உறுதிப்படுத்தியுள்ளனர். இந்த இயற்கைச் சீற்றம் ஐந்து லட்சத்துக்கும் மேற்பட்ட குடியிருப்பாளர்களின் இயல்பு வாழ்க்கையை முற்றிலுமாக முடக்கியுள்ளது.

வெலிங்டனின் புறநகர்ப் பகுதியான ஸ்டோக்ஸ் பள்ளத்தாக்கு (Stokes Valley) மிக மோசமாக பாதிக்கப்பட்டுள்ளது. வீடுகளுக்குள் தண்ணீர் புகுந்ததாலும், சாலைகள் துண்டிக்கப்பட்டதாலும் மக்கள் பெரும் அவதிக்கு உள்ளாகியுள்ளனர்.

நிலைமையைக் கட்டுப்படுத்த சுத்தம் செய்யும் பணியாளர்கள் போர்க்கால அடிப்படையில் களமிறக்கப்பட்டுள்ளனர். சேறும் சகதியுமாக மாறியுள்ள தெருக்களில் இருந்து குப்பைகளையும், வெள்ளத்தில் அடித்து வரப்பட்ட மரங்களையும் அகற்றும் பணி தீவிரமாக நடைபெற்று வருகிறது.

இதற்கிடையில், வங்கானுய் மாவட்டத்தில் நிலைமை மேலும் மோசமடைந்துள்ளது. கட்டுக்கடங்காத வெள்ளப்பெருக்கு காரணமாக அங்கு அவசர நிலை பிரகடனப்படுத்தப்பட்டுள்ளது.

ரேடியோ நியூசிலாந்து வெளியிட்டுள்ள தகவலின்படி, தாழ்வான பகுதிகளில் வசித்த 18 பேர் பாதுகாப்பான இடங்களுக்கு அப்புறப்படுத்தப்பட்டுள்ளனர். ஆறுகளில் நீர்மட்டம் அபாய கட்டத்தைத் தாண்டி ஓடுவதால், மேலும் பல குடும்பங்கள் வெளியேற்றப்படலாம் என அஞ்சப்படுகிறது.

அந்த நாட்டின் வானிலை ஆய்வு மையம் விடுத்துள்ள எச்சரிக்கை, மக்களின் கவலையை மேலும் அதிகரித்துள்ளது. வெலிங்டன் மற்றும் அதன் சுற்றுவட்டாரப் பகுதிகளில் வரும் நாட்களில் மேலும் இடியுடன் கூடிய மழையும், கனமழையும் பெய்ய வாய்ப்புள்ளதாக தெரிவிக்கப்பட்டுள்ளது.

குறிப்பாக, கடந்த வாரம் இப்பகுதியை தாக்கிய வையானு புயலின் (Cyclone Vaianu) பாதிப்புகளிலிருந்து மக்கள் இன்னும் முழுமையாக மீளாத நிலையில், இந்த அடுத்தடுத்த வெள்ள அபாயம் அவர்களை நிலைகுலையச் செய்துள்ளது. புயலால் சேதமடைந்த உட்கட்டமைப்புகள் சீரமைக்கப்படாத நிலையில், தற்போதைய கனமழை நிலைமையை மேலும் சிக்கலாக்கியுள்ளது.

போக்குவரத்து சேவைகள் கடுமையாக பாதிக்கப்பட்டுள்ளதோடு, பல பகுதிகளில் மின்சாரம் மற்றும் குடிநீர் விநியோகமும் துண்டிக்கப்பட்டுள்ளதாக உள்ளூர் ஊடகங்கள் தெரிவிக்கின்றன.

மீட்பு மற்றும் நிவாரணப் பணிகளை முடுக்கிவிட அரசு தீவிர நடவடிக்கைகளை எடுத்து வருகிறது.

Hindusthan Samachar / vidya.b