காஜிப்பூர், 25 ஏப்ரல் (ஹி.ச)

உத்தரப்பிரதேச மாநிலம் காஜிப்பூரில் உள்ள ஒரு கிராமத்தில் ஏப்ரல் 14-ஆம் தேதி காணாமல் போன அந்த சிறுமி, ஏப்ரல் 15-ஆம் தேதி கங்கை ஆற்றின் மீதான பாலத்தின் அருகே சடலமாக மீட்கப்பட்டார்.

இச்சம்பவத்திற்கு கண்டனம் தெரிவித்துள்ள காங்கிரஸ் பொதுச்செயலாளர் பிரியங்கா காந்தி வத்ரா, உத்தரப்பிரதேசத்தில் பெண்களுக்கு எதிரான குற்றங்கள் அதிகரித்து வருவதாகக் கூறி, பிரதமர் நரேந்திர மோடியை கடுமையாக விமர்சித்தார்.

இது தொடர்பாக பிரியங்கா காந்தி எக்ஸ் தளத்தில் இன்று பதிவிட்டிருப்பதாவது,

உத்தரப்பிரதேச மாநிலம் காஜிப்பூரில், ஒரு பெண் படுகொலை செய்யப்பட்ட வழக்கில் புகாரைப் பதிவு செய்யக் காட்டிய தயக்கம், அதைத் தொடர்ந்து பாதிக்கப்பட்ட குடும்பத்தினருக்கு விடுக்கப்பட்ட மிரட்டல்கள் மற்றும் அதிகார பலம் கொண்டவர்களால் ஏற்படுத்தப்பட்ட குழப்பங்கள் ஆகியவை, அம்மாநிலத்தில் பெண்களுக்கு எதிரான வன்கொடுமைகள் உச்சகட்டத்தை எட்டியிருப்பதை உணர்த்துகின்றன.

பாஜக ஆட்சியில், இதுவே தற்போது ஒரு எழுதப்படாத விதியாகிவிட்டது. எப்போதெல்லாம் ஒரு பெண் வன்கொடுமைக்கு ஆளாகிறாளோ, அப்போதெல்லாம் பாதிக்கப்பட்ட அந்தப் பெண்ணே மேலும் சித்திரவதைக்கு உள்ளாக்கப்படுகிறாள்.

பெண்கள் குறித்துப் பிரதமர் வெளியிடும் ஆடம்பரமான அறிக்கைகள் யாவும் வெறும் வெளிவேஷமே. உன்னாவோ, ஹத்ராஸ், பிரயாக்ராஜ் அல்லது காஜிப்பூர் என—பெண்கள் எங்கு அநீதிக்கு ஆளாகியிருந்தாலும், பாஜக தனது முழு அதிகாரத்தையும் பயன்படுத்தி, பாதிக்கப்பட்ட பெண்ணுக்கு எதிராக நின்று, ஒடுக்குமுறையாளருக்கே துணை நின்றுள்ளது.

நாடு முழுவதும் உள்ள பெண்கள் இந்த இருண்ட கால ஆட்சியை நேரில் கண்டு வருகின்றனர்.

இவ்வாறு அவர் கூறியுள்ளார்.

Hindusthan Samachar / vidya.b