விஜயநகரம், 28 ஏப்ரல் (ஹி.ச.)

ஆந்திர மாநிலம் விஜயநகரம் மாவட்டம் புசபாதிரேகா அருகே தேசிய நெடுஞ்சாலையில் நேற்று நள்ளிரவு நேரத்தில் நிகழ்ந்த கோர விபத்தில் 4 பேர் சம்பவ இடத்திலேயே உடல் நசுங்கி பரிதாபமாக உயிரிழந்தனர்.

மேலும் ஒருவர் படுகாயங்களுடன் உயிருக்குப் போராடி வருகிறார்.

நள்ளிரவு 12 மணிக்குப் பின், அதிவேகமாக வந்த கார் ஒன்று, சாலையோரம் நிறுத்தி வைக்கப்பட்டிருந்த லாரியின் பின்பகுதியில் பயங்கரமாக மோதியதில் இந்த விபத்து நேரிட்டுள்ளது.

மோதிய வேகத்தில் காரின் முன்பகுதி முற்றிலும் நொறுங்கியதால், அதில் பயணித்தவர்கள் இடிபாடுகளுக்குள் சிக்கிக்கொண்டனர்.

தகவலறிந்து விரைந்து வந்த புசபாதிரேகா போலீசார், உள்ளூர் மக்களின் உதவியுடன் மீட்புப் பணிகளில் ஈடுபட்டனர். காருக்குள் சிக்கியிருந்தவர்களை நீண்ட போராட்டத்திற்குப் பின் வெளியே மீட்டனர்.

ஆனால், அதற்குள் 4 பேர் உயிரிழந்திருந்தனர். படுகாயமடைந்த ஒருவரை ஆம்புலன்ஸ் மூலம் விஜயநகரம் அரசு மருத்துவமனைக்கு அனுப்பி வைத்து தீவிர சிகிச்சை அளிக்கப்பட்டு வருகிறது. அவரது நிலைமை கவலைக்கிடமாக உள்ளதாக மருத்துவர்கள் தெரிவித்தனர்.

சம்பவ இடத்திற்கு நேரில் வந்து ஆய்வு செய்த போலீசார், அதிவேகமே விபத்துக்கு முக்கிய காரணம் என முதற்கட்ட விசாரணையில் தெரிவித்துள்ளனர்.

லாரி சாலையோரம் முறையாக நிறுத்தப்பட்டிருந்ததா, கார் ஓட்டுநர் மது அருந்தியிருந்தாரா என்பன உள்ளிட்ட கோணங்களிலும் விசாரணை தீவிரப்படுத்தப்பட்டுள்ளது.

உயிரிழந்தவர்களின் அடையாளங்கள் இதுவரை உறுதி செய்யப்படவில்லை. உடற்கூறு ஆய்வுக்காக சடலங்கள் அரசு மருத்துவமனைக்கு அனுப்பப்பட்டுள்ளன.

இந்த விபத்து குறித்து புசபாதிரேகா போலீசார் வழக்குப் பதிவு செய்து, மேல் விசாரணை நடத்தி வருகின்றனர்.

தேசிய நெடுஞ்சாலைகளில் இரவு நேரங்களில் சாலையோரம் நிறுத்தப்படும் கனரக வாகனங்களால் தொடர்ந்து விபத்துகள் நிகழ்ந்து வருவது பெரும் கவலையை ஏற்படுத்தியுள்ளது.

வாகன ஓட்டிகள் வேகக் கட்டுப்பாட்டை கடைபிடிக்க வேண்டும் என போலீசார் மீண்டும் எச்சரிக்கை விடுத்துள்ளனர்.

Hindusthan Samachar / vidya.b