சேலம், 18 மே (ஹி.ச.)

தமிழகத்தின் முக்கிய நீராதாரமான சேலம் மாவட்டம் மேட்டூர் அணையின் நீர்மட்டம் தொடர்ந்து சரிவை சந்தித்து வருகிறது.

கடந்த 24 மணி நேரத்தில் அணையின் நீர்மட்டம் 79.07 அடியில் இருந்து 78.98 அடியாக குறைந்துள்ளது. இதன் மூலம் நீர்மட்டம் 79 அடிக்கும் கீழ் சென்றுள்ளது. அணையின் மொத்த கொள்ளளவான 120 அடியில், இன்று காலை நிலவரப்படி 78.98 அடி மட்டுமே நீர் உள்ளதாக பொதுப்பணித்துறை தெரிவித்துள்ளது.

தற்போதைய நீர் இருப்பு 40.94 டி.எம்.சி.யாக பதிவாகியுள்ளது. மொத்த கொள்ளளவான 93.47 டி.எம்.சி.யில் இது 44% மட்டுமே ஆகும். கடந்த சில வாரங்களாகவே நீர் இருப்பு படிப்படியாக குறைந்து வருவது விவசாயிகள் மத்தியில் கவலையை ஏற்படுத்தியுள்ளது.

அதே நேரத்தில், மேட்டூர் அணைக்கு வரும் நீர்வரத்து சற்று அதிகரித்துள்ளது. வினாடிக்கு 180 கன அடியாக இருந்த நீர்வரத்து, தற்போது 239 கன அடியாக உயர்ந்துள்ளது.

கர்நாடகாவின் கபினி மற்றும் கிருஷ்ணராஜ சாகர் அணைகளில் இருந்து திறக்கப்படும் நீரின் அளவை பொறுத்து மேட்டூர் அணையின் நீர்வரத்து மாறுபடுகிறது.

டெல்டா பாசனத்திற்கு நீர் திறப்பு நிறுத்தப்பட்டுள்ள நிலையில், குடிநீர் தேவைக்காக மட்டும் அணையில் இருந்து வினாடிக்கு 1,000 கன அடி நீர் தொடர்ந்து வெளியேற்றப்பட்டு வருகிறது. நீர்வரத்தை விட வெளியேற்றம் அதிகமாக இருப்பதால் நீர்மட்டம் தொடர்ந்து சரிந்து வருகிறது.

கோடை காலம் தொடங்கியுள்ள நிலையில் அணையின் நீர்மட்டம் 80 அடிக்கும் கீழ் சென்றிருப்பது டெல்டா மற்றும் மேட்டூர் அணையை நம்பியுள்ள விவசாயிகளிடையே அச்சத்தை ஏற்படுத்தியுள்ளது. வரும் நாட்களில் பருவமழை தொடங்கி நீர்வரத்து அதிகரிக்கும் என எதிர்பார்க்கப்படுகிறது.

மேட்டூர் அணையின் நீர்மட்டம் மற்றும் நீர் இருப்பை பொதுப்பணித்துறை அதிகாரிகள் தொடர்ந்து கண்காணித்து வருகின்றனர்.

Hindusthan Samachar / vidya.b