ஜக்தல்பூர், 19 மே (ஹி.ச.)

உத்தராகண்ட் முதல்வர் புஷ்கர் சிங் தாமி, மத்திய பிரதேச முதல்வர் மோகன் யாதவை இன்று ஜக்தல்பூரில் மரியாதை நிமித்தமாக சந்தித்தார்.

இரு மாநிலங்களுக்கும் இடையிலான பரஸ்பர நலன்சார்ந்த சமகால விவகாரங்கள் குறித்து இரு தலைவர்களும் விரிவாகக் கலந்துரையாடினர் என அதிகாரப்பூர்வ அறிக்கையில் தெரிவிக்கப்பட்டுள்ளது.

சந்திப்பின்போது, உத்தராகண்டின் புனிதத் தலங்களான கேதார்நாத், பத்ரிநாத், கங்கோத்ரி, யமுனோத்ரி ஆகியவற்றை உள்ளடக்கிய ‘சார் தாம் யாத்திரை’ மேற்கொள்ளுமாறு முதல்வர் மோகன் யாதவுக்கு முதல்வர் தாமி நேரில் அழைப்பு விடுத்தார்.

இரு மாநிலங்களுக்கும் இடையிலான வளர்ச்சி, பரஸ்பர ஒத்துழைப்பு மற்றும் கலாசார உறவுகளை வலுப்படுத்தும் வழிகள் குறித்து விவாதித்ததாக முதல்வர் தாமி பின்னர் தெரிவித்தார்.

இந்த கூட்டுறவு பகிரப்பட்ட வளர்ச்சிக்கும் செழிப்புக்கும் முக்கிய படியாக அமையும் என்றும் அவர் குறிப்பிட்டார்.

கடந்த டிசம்பர் 2024-ல் மத்திய பிரதேசத்தின் சாகர் நகரில் நடந்த ‘ஜன் கல்யாண் பர்வ்’ மற்றும் லக்கா பஞ்சாரா ஏரி புனரமைப்பு விழாவில் இரு முதல்வர்களும் ஒன்றாக கலந்துகொண்டனர். அப்போது சாகரில் தனது குழந்தைப் பருவத்தை கழித்ததை தாமி நினைவுகூர்ந்திருந்தார்.

மேலும், ஜூன் 2025-ல் வாரணாசியில் நடைபெற்ற 25-வது மத்திய மண்டல கவுன்சில் கூட்டத்திலும் இருவரும் பங்கேற்று, மத்திய அரசின் திட்டங்கள் மற்றும் மாநில வளர்ச்சி குறித்து ஆலோசித்தனர்.

சத்தீஸ்கர், மத்திய பிரதேசம், உத்தராகண்ட், உத்தர பிரதேசம் ஆகிய நான்கு மாநிலங்களை உள்ளடக்கிய இந்த கவுன்சில் கூட்டத்தில் வளர்ச்சி திட்டங்களின் செயலாக்கம் குறித்து விவாதிக்கப்பட்டது.

பாஜக ஆளும் இரு மாநில முதல்வர்களின் இந்த சந்திப்பு, இந்தி பேசும் மாநிலங்களுக்கிடையேயான ஒருங்கிணைப்பை வலுப்படுத்தும் முயற்சியாக பார்க்கப்படுகிறது.

சுற்றுலா, புனித யாத்திரை, நீர் மேலாண்மை, ஸ்மார்ட் சிட்டி திட்டங்கள் போன்றவற்றில் அனுபவங்களை பகிர்ந்துகொள்ள இரு மாநிலங்களும் தொடர்ந்து ஆர்வம் காட்டி வருகின்றன.

Hindusthan Samachar / vidya.b