பெங்களூரு, 25 மே (ஹி.ச.)

கர்நாடக முதலமைச்சர் சித்தராமையா நாளை

(மே 26-ஆம் தேதி) டெல்லியில் காங்கிரஸ் கட்சியின் மேலிடத் தலைவர்களை சந்திக்க உள்ளார்.

மாநிலத்தில் காங்கிரஸ் அரசு பதவியேற்று மூன்று ஆண்டுகள் நிறைவடைந்துள்ள நிலையில் இந்த சந்திப்பு நடைபெறுகிறது.

கர்நாடகாவில் தலைமை மாற்றம் குறித்த ஊகங்கள் மீண்டும் எழுந்துள்ள நிலையில், காங்கிரஸ் மேலிடம் சித்தராமையாவை டெல்லிக்கு அழைத்துள்ளது.

முதலமைச்சர் பதவி தொடர்பாக சித்தராமையாவுக்கும் துணை முதலமைச்சர் டி.கே. சிவகுமாருக்கும் இடையே நீண்டகாலமாக கருத்து வேறுபாடு நிலவி வருகிறது.

தகவல்களின்படி, சித்தராமையா தனது பயணத்தின்போது ராகுல் காந்தியை சந்திக்க உள்ளார்.

வரவிருக்கும் மாநிலங்களவைத் தேர்தல் மற்றும் சட்ட மேலவைத் தேர்தலுக்கான ஆயத்தப் பணிகள் குறித்து இந்த சந்திப்பில் விவாதிக்கப்படலாம் எனத் தெரிகிறது.

எனினும், சந்திப்பின் சரியான நோக்கம் இன்னும் தெளிவாகவில்லை.

கடந்த 18 மாதங்களாகவே சிவகுமாரின் ஆதரவாளர்கள் அவர் விரைவில் முதலமைச்சராவார் எனத் தொடர்ந்து கூறி வருகின்றனர்.

ஆனால், அந்த மாற்றம் இதுவரை நிகழவில்லை. “மூன்று ஆண்டுகளாக ஒரே பல்லவிதான்” என்று கட்சியின் மூத்த நிர்வாகி ஒருவர் தெரிவித்தார்.

கர்நாடக மாநில காங்கிரஸ் கட்சியில் அதிருப்தி அதிகரித்து வருவதாகவும், நிச்சயமற்ற நிலையை முடிவுக்குக் கொண்டுவருமாறு பல தலைவர்கள் மேலிடத்தை வலியுறுத்தி வருவதாகவும் தகவல்கள் தெரிவிக்கின்றன.

இந்த நீடித்த முடிவெடுக்காத நிலை மாநிலத்தில் கட்சியின் நற்பெயருக்கு பாதிப்பை ஏற்படுத்துவதாக அவர்கள் கருதுகின்றனர். எனினும், பல்வேறு காரணங்களைச் சுட்டிக்காட்டி மேலிடம் இதுவரை இறுதி முடிவு எதையும் எடுக்கவில்லை.

சித்தராமையா நாளை டெல்லிக்கு அழைக்கப்பட்டுள்ள நிலையில், காங்கிரஸ் மேலிடத்துடனான அவரது சந்திப்பின் முடிவு என்னவாக இருக்கும் என்பதே அனைவரின் கவனத்தையும் ஈர்த்துள்ளது.

Hindusthan Samachar / vidya.b