இமாச்சல பிரதேசம், 27 மே (ஹி.ச.)

திபெத்திய பௌத்த துறவிகள் மற்றும் நாடுகடந்த திபெத்திய சமூகத்தினர், இமயமலைப் பகுதியில் உள்ள பௌத்தர்களுடன் இணைந்து, இன்று அமைதிக்கான சிறப்பு பிரார்த்தனைகளுடன் த்சேச்சு (Tshechu) விழாவை அனுசரித்தனர்.

திபெத்திய பௌத்தத்தில் மிகவும் புனிதமான விழாக்களில் ஒன்றான த்சேச்சு, குரு பத்மசம்பவர் என்றும் குரு ரின்போச்சே என்றும் அழைக்கப்படுபவருக்கு அர்ப்பணிக்கப்பட்டதாகும்.

இது தொடர்பாக திபெத்திய பௌத்த துறவி ஆச்சார்யா செடுப் லோடோயே ஜாங்போ, செய்தியாளர்களிடம் கூறுகையில்,

இந்த உலகில் நாம் ஏராளமான சிரமங்களை எதிர்கொண்டு வரும் இந்த நேரத்தில், நமக்கு அமைதி, நல்லிணக்கம், செழிப்பு மற்றும் நீண்ட ஆயுள் தேவை. குரு பத்மசம்பவர் இந்தியா மற்றும் திபெத்துக்கு விஜயம் செய்தபோது, தனது நூல்களிலும் போதனைகளிலும், குறிப்பாக இதுபோன்ற கடினமான மற்றும் சீரழிவான காலங்களில், மக்கள் தன்னை நோக்கி பிரார்த்தனை செய்ய வேண்டும் என்று கூறினார். இதன் மூலம் முழு பிரபஞ்சமும் அனைத்து உயிர்களும் நீண்ட ஆயுள், நல்லிணக்கம் மற்றும் செழிப்புக்கான ஆசிகளைப் பெறுவார்கள் என்று கூறினார்.

திபெத்திய சமூகத்தைச் சேர்ந்த டென்சின் சாங்ரூப், சாகா தாவா கூறுகையில்,

திபெத்திய பௌத்தத்தின் புனித மாதம். நாங்கள் இதை சாகா தாவா என்கிறோம். சாகா தாவா என்றால் புத்த பகவான் பிறந்த, ஞானம் அடைந்த மற்றும் நிர்வாணம் அடைந்த காலம் என்று பொருள். எனவே இந்த மாதம் மிகவும் மங்களகரமானது.

அதற்கும் மேலாக, சாகா தாவாவின் 10-ஆம் நாளான இன்று, எங்கள் மடாலயத்தில் நாள் முழுவதும் சாம் நடனம் நடத்தப்படுகிறது. இது தொடர்ந்து நடைபெறும். இதை நாங்கள் த்சேச்சு என்கிறோம். த்சேச்சு என்றால் சாகா தாவா மாதத்தின் 10-ஆம் நாள் என்று பொருள். இன்று மடாலயத்தைத் தவிர, சிம்லாவைச் சுற்றியுள்ள உள்ளூர் திபெத்திய மக்கள் மற்றும் இமயமலைப் பகுதி மக்கள் அனைவரும் இந்த சாம் நடனத்தின் ஆசியைப் பெற வந்துள்ளனர்.

இந்தியாவில் எங்களுக்கு மத உரிமை உள்ளது. அந்த மதம், எங்கள் மக்கள் மற்றும் இமயமலை மக்கள் அனைவரையும் ஒன்றிணைக்கிறது.

இந்த மதம் எவ்வளவு பழமையானது, அதை நாம் எப்படி பாதுகாத்து வருகிறோம் என்பதை இது காட்டுகிறது. அந்த பாதுகாப்பு, இந்த விழாவின் முக்கியத்துவத்தையும் நடைபெறும் மத சடங்குகளையும் எங்கள் குழந்தைகளுக்குக் கற்றுக்கொடுக்கிறது.

இவ்வாறு அவர் மேலும் தெரிவித்தார்.

Hindusthan Samachar / vidya.b