புதுடெல்லி, 06 மே (ஹி.ச.)

அசாம் மற்றும் மேற்கு வங்க சட்டமன்றத் தேர்தல்களில் பாரதிய ஜனதா கட்சி (பாஜக) குறிப்பிடத்தக்க வெற்றிகளைப் பெற்றதைத் தொடர்ந்து, மக்களவை எதிர்க்கட்சித் தலைவர் ராகுல் காந்தி, ‘வாக்கு திருட்டு’ குற்றச்சாட்டை மீண்டும் முன்வைத்ததுடன், பாஜக எம்.பி.க்கள் மற்றும் எம்.எல்.ஏ.க்களை ‘ஊடுருவல்காரர்கள்’ என விமர்சித்துள்ளார்.

இது தொடர்பாக ராகுல் காந்தி இன்று எக்ஸ் தளத்தில் வெளியிட்ட பதிவில் கூறியிருப்பதாவது,

சில நேரங்களில் வாக்குத் திருட்டு மூலம் இடங்கள் திருடப்படுகின்றன, சில நேரங்களில் முழு அரசாங்கங்களும் திருடப்படுகின்றன.

மக்களவையில் உள்ள 240 பாஜக எம்.பி.க்களில், ஏறக்குறைய ஒவ்வொரு ஆறாவது எம்.பி.யும் வாக்குத் திருட்டு மூலமே வெற்றி பெற்றுள்ளார். அவர்களை அடையாளம் காண்பது கடினமல்ல - பாஜகவின் சொந்த மொழியில் அவர்களை 'ஊடுருவல்காரர்கள்' என்று அழைக்கலாமா?

ஹரியானாவைப் பற்றிச் சொல்ல வேண்டுமானால்? அங்கே, முழு அரசாங்கமுமே 'ஊடுருவல்காரர்கள்'தான்.

அவர்கள் தங்கள் கைக்குள் வைத்திருக்கும் நிறுவனங்கள், வாக்காளர் பட்டியல்களையும் தேர்தல் செயல்முறையையும் திருத்தும் நிறுவனங்கள் - அவையே 'ரிமோட் கண்ட்ரோல்' செய்யப்பட்டவை.

அவர்களின் உண்மையான பயம் உண்மைதான். ஏனென்றால், நியாயமான தேர்தல்கள் நடத்தப்பட்டால், இன்றும் அவர்களால் 140 இடங்களைக் கூட வெல்ல முடியாது.

என்று அவர் பதிவிட்டுள்ளார்.

மேற்கு வங்கத்தில் பாஜக 206 இடங்களை வென்று வரலாற்று சாதனை படைத்தது. 2021 தேர்தலில் அக்கட்சி 77 இடங்களை மட்டுமே வென்றிருந்தது.

கடந்த சட்டமன்றத்தில் 212 இடங்களை வென்ற திரிணாமுல் காங்கிரஸ், இம்முறை 80 இடங்களை மட்டுமே பெற்றது.

அசாமில் பாஜக 82 இடங்களை வென்றது. அதன் கூட்டணிக் கட்சிகளான போடோலாந்து மக்கள் முன்னணி மற்றும் அசாம் கண பரிஷத் தலா 10 இடங்களைப் பெற்றன.

காங்கிரஸ் மற்றும் அதன் கூட்டணிக் கட்சிகள் 21 இடங்களை மட்டுமே வெல்ல முடிந்தது,என்பது குறிப்பிடத்தக்கது

Hindusthan Samachar / vidya.b