சென்னை, 20 ஜூன் (ஹி.ச.)

நாளை நடைபெற உள்ள நீட் மறுத்தேர்வை முன்னிட்டு, நாடு முழுவதும் அமைக்கப்பட்டுள்ள தேர்வு மையங்களில் இன்று விரிவான பாதுகாப்பு ஒத்திகை நடவடிக்கைகள் மேற்கொள்ளப்பட்டன.

முறைகேடுகளை முற்றிலும் தடுக்கும் நோக்கில் தேசிய தேர்வு முகமை மற்றும் உள்ளூர் நிர்வாகங்கள் இணைந்து பல்வேறு முன்னெச்சரிக்கை நடவடிக்கைகளை தீவிரப்படுத்தியுள்ளன.

சென்னை உள்ளிட்ட தேர்வு மையங்களுக்கு இன்று வருகை தந்த துணை ராணுவப் படையினர், மையங்களின் பாதுகாப்பு ஏற்பாடுகளை நேரடியாக ஆய்வு செய்தனர்.

நுழைவாயில்களில் மேற்கொள்ளப்படும் சோதனை நடைமுறைகள், கண்காணிப்பு கேமராக்களின் செயல்பாடு, விடைத்தாள் பாதுகாப்பு அறைகள் மற்றும் அவசரகால வெளியேறும் வழிகள் ஆகியவை குறித்து விரிவான ஒத்திகை நடத்தப்பட்டது.

ஒவ்வொரு மையத்திலும் மாணவர்கள் தேர்வு அறைக்குள் நுழைவது முதல் தேர்வு முடிந்து வெளியேறும் வரையிலான அனைத்து நடைமுறைகளும் ஒத்திகை பார்க்கப்பட்டன.

கடந்த முறை எழுந்த சர்ச்சைகளை கருத்தில் கொண்டு, இந்த முறை கூடுதல் கவனம் செலுத்தப்பட்டுள்ளது.

தேர்வு மையங்கள் முழுவதும் சிசிடிவி கண்காணிப்பு கட்டாயமாக்கப்பட்டுள்ளதுடன், ஒவ்வொரு அறையிலும் நேரடி கண்காணிப்புக்காக பறக்கும் படையினரும் நியமிக்கப்பட்டுள்ளனர்.

மாணவர்கள் மின்னணு சாதனங்கள், ஸ்மார்ட் வாட்ச் உள்ளிட்டவற்றை எடுத்துச் செல்ல முழுமையான தடை விதிக்கப்பட்டுள்ளது.

மேலும், வினாத்தாள் மற்றும் விடைத்தாள் பாதுகாப்பிற்காக ஜிபிஎஸ் பொருத்தப்பட்ட பாதுகாப்பு வாகனங்கள் பயன்படுத்தப்பட உள்ளன.

தேசிய தேர்வு முகமை அதிகாரிகள், மாவட்ட ஆட்சியர்கள் மற்றும் காவல்துறை உயர் அதிகாரிகள் இணைந்து பாதுகாப்பு ஏற்பாடுகளை தொடர்ந்து கண்காணித்து வருகின்றனர்.

மாணவர்கள் அச்சமின்றி தேர்வு எழுத ஏதுவான சூழலை உருவாக்குவதே தங்களின் முதன்மை நோக்கம் என அதிகாரிகள் தெரிவித்துள்ளனர்.

நாளை காலை நடைபெறும் மறுத்தேர்வில் லட்சக்கணக்கான மாணவர்கள் பங்கேற்க உள்ள நிலையில், நாடு முழுவதும் பாதுகாப்பு வளையத்திற்குள் தேர்வு மையங்கள் கொண்டுவரப்பட்டுள்ளன.

Hindusthan Samachar / vidya.b