சென்னை, 08 ஜூன் (ஹி.ச)

சென்னை அண்ணாநகரில் அமைந்துள்ள மத்திய இடைநிலைக் கல்வி வாரியத்தின் (சிபிஎஸ்இ) மண்டல அலுவலகம் இன்று காலை இந்திய மாணவர் சங்கத்தினரால் முற்றுகையிடப்பட்டது.

மத்திய அரசால் நடத்தப்படும் பல்வேறு போட்டித் தேர்வுகளில் தொடர்ந்து முறைகேடுகள் நடைபெற்று வருவதைக் கண்டித்து இந்த போராட்டம் நடைபெற்றது.

நீட் தேர்வு, யுஜிசி நெட், சியுஇடி உள்ளிட்ட தேசிய அளவிலான தேர்வுகளில் வினாத்தாள் கசிவு, ஆள்மாறாட்டம் மற்றும் மதிப்பெண் முறைகேடு போன்ற சம்பவங்கள் மாணவர்களின் எதிர்காலத்தை கேள்விக்குறியாக்குவதாக போராட்டக்காரர்கள் குற்றம்சாட்டினர்.

அலுவலகத்தின் பிரதான வாயிலை முற்றுகையிட்டு முழக்கங்கள் எழுப்பிய மாணவர்கள், தேர்வு முறைகேடுகளுக்கு காரணமானவர்கள் மீது கடும் நடவடிக்கை எடுக்க வேண்டும் என்றும், தேர்வு நடைமுறைகளில் முழுமையான வெளிப்படைத்தன்மையை உறுதி செய்ய வேண்டும் என்றும் வலியுறுத்தினர்.

மேலும், பாதிக்கப்பட்ட மாணவர்களுக்கு உரிய நீதி வழங்க வேண்டும் என்றும், தேசிய தேர்வு முகமையின் செயல்பாடுகளை மறுசீரமைக்க வேண்டும் என்றும் கோரிக்கை விடுத்தனர்.

முற்றுகை போராட்டம் காரணமாக அண்ணாநகர் பகுதியில் சிறிது நேரம் பரபரப்பு நிலவியது. சம்பவ இடத்திற்கு விரைந்த காவல்துறையினர் போராட்டத்தில் ஈடுபட்டவர்களுடன் பேச்சுவார்த்தை நடத்தி நிலைமையை கட்டுக்குள் கொண்டு வந்தனர்.

மாணவர்களின் கோரிக்கை மனுவை அதிகாரிகள் பெற்றுக்கொண்டதை அடுத்து போராட்டம் தற்காலிகமாக விலக்கிக் கொள்ளப்பட்டது.

தேர்வு முறைகேடுகளுக்கு நிரந்தர தீர்வு காணப்படாவிட்டால், அடுத்த கட்டமாக மாநிலம் தழுவிய போராட்டங்கள் நடத்தப்படும் என இந்திய மாணவர் சங்கத்தினர் எச்சரிக்கை விடுத்துள்ளனர்.

Hindusthan Samachar / vidya.b