அமராவதி , 18 ஜூலை (ஹி.ச.)

ஆந்திரப் பிரதேசம் போலவரம் மாவட்டம், ஏடபாகா மண்டலத்தில் உள்ள கோல்லகூடேம் அருகே கோதாவரி ஆற்றில் மீன்பிடிக்கச் சென்ற 5 பழங்குடியினர் ஆற்றின் வேகமான நீரோட்டத்தில் சிக்கி உயிரிழந்த சம்பவம் பெரும் சோகத்தை ஏற்படுத்தியுள்ளது.

உயிரிழந்தவர்கள் கொம்முகொத்தகூடேம் கிராமத்தைச் சேர்ந்த துர்ரம் பாரதி, ஊகே சுசீலா, ஊகே லட்சுமி, பாசிபோயின பாலராஜு மற்றும் ஊகே ரமேஷ் என அதிகாரிகள் தெரிவித்தனர்.

இந்தச் சம்பவம் குறித்து தகவல் கிடைத்தவுடன் முதல்-மந்திரி சந்திரபாபு நாயுடு அதிகாரிகளிடம் தொலைபேசியில் பேசி விவரங்களை கேட்டறிந்தார்.

பின்னர் உயிரிழந்தவர்களின் குடும்பங்களுக்கு உடனடியாக நிதியுதவி மற்றும் தேவையான அனைத்து நிவாரண உதவிகளையும் வழங்க மாவட்ட நிர்வாகத்திற்கு உத்தரவிட்டார். மேலும், பாதிக்கப்பட்ட குடும்பங்களுக்கு மாநில அரசு முழு ஆதரவாக இருக்கும் என்றும் உறுதியளித்தார்.

துணை முதல்-மந்திரி பவன் கல்யாணும் இந்த துயரச் சம்பவம் தம்மை மிகவும் வேதனைக்குள்ளாக்கியதாக தெரிவித்துள்ளார்.

மாவட்ட கலெக்டருடன் பேசி விபத்து ஏற்பட்ட சூழ்நிலைகள் குறித்து கேட்டறிந்த அவர், உயிரிழந்தவர்களின் குடும்பங்களுக்கு ஆழ்ந்த இரங்கலைத் தெரிவித்ததுடன், அரசின் சார்பில் எந்தக் குறையும் இல்லாத வகையில் தேவையான அனைத்து உதவிகளையும் உடனடியாக வழங்க அதிகாரிகளுக்கு அறிவுறுத்தினார்.

இதற்கிடையில், மாநில உள்துறை மந்திரி வங்கலபூடி அனிதாவும் மாவட்ட கலெக்டர் மற்றும் போலீஸ் சூப்பிரண்டுடன் தொலைபேசியில் தொடர்புகொண்டு மீட்பு மற்றும் நிவாரணப் பணிகள் குறித்து ஆய்வு செய்தார்.

வழக்கமாக மீன்பிடி நடைபெறும் பகுதியில் இந்த விபத்து எவ்வாறு ஏற்பட்டது என்பது குறித்து முழுமையான விசாரணை நடத்த போலீசாருக்கு உத்தரவிட்டதுடன், உயிரிழந்தவர்களின் குடும்பங்களுக்கு அரசு உதவிகள் தாமதமின்றி கிடைப்பதை உறுதி செய்யவும் அறிவுறுத்தினார்.

Hindusthan Samachar / M.DEEPAK RAJA