புதுடெல்லி, 18 ஜூலை (ஹி.ச.)

டெல்லி ஜந்தர் மந்தரில் கரப்பான் ஜனதா கட்சி (CJP) சார்பில் இன்று நடத்தப்பட்ட போராட்டத்தில் இடதுசாரி மாணவர் அமைப்புகளைச் சேர்ந்தவர்கள் இணைந்து கொண்டனர்.

அகில இந்திய மாணவர் கூட்டமைப்பு (AISF), இந்திய மாணவர் கூட்டமைப்பு (SFI), அகில இந்திய மாணவர் சங்கம் (AISA) உள்ளிட்ட அமைப்புகளைச் சேர்ந்தவர்கள் இந்த போராட்டத்தில் பங்கேற்றனர்.

நீட் தேர்வு வினாத்தாள் கசிவு சம்பவத்தைத் தொடர்ந்து மத்திய கல்வி அமைச்சர் தர்மேந்திர பிரதான் பதவி விலக வேண்டும் என போராட்டக்காரர்கள் வலியுறுத்தினர்.

மாணவர்களும் அரசியல் செயற்பாட்டாளர்களும் இணைந்து நடத்திய இந்த கூட்டு ஆர்ப்பாட்டத்தில் முழக்கங்களை எழுப்பியும் பதாகைகளை ஏந்தியும் தங்கள் கோரிக்கைகளை வலியுறுத்தினர்.

போராட்டக்காரர்களை டெல்லி காவல்துறையினர் அப்புறப்படுத்தத் தொடங்கியதை அடுத்து, கரப்பான் ஜனதா கட்சியின் நிறுவனர் அபிஜீத் தீப்கே தனது காலவரையற்ற உண்ணாவிரதப் போராட்டத்தை தொடங்குவதாக அறிவித்தார்.

காலநிலை செயற்பாட்டாளர் சோனம் வாங்சுக் தனது உண்ணாவிரதத்தின் 21-வது நாளில் மருத்துவமனையில் அனுமதிக்கப்பட்டதைத் தொடர்ந்து இந்த நடவடிக்கை எடுக்கப்பட்டுள்ளது.

மேடையில் இருந்து பேசிய தீப்கே கூறுகையில்,

இன்று முதல் எனது காலவரையற்ற உண்ணாவிரதப் போராட்டத்தை தொடங்குகிறேன். அனைவருக்கும் வேண்டுகோள் விடுக்கிறேன்: பின்வாங்காதீர்கள்.

இந்த இயக்கம் மேலும் பெரிதாக வளரும். அவர்கள் மிகப்பெரிய தவறை செய்துவிட்டார்கள். அனைவரும் ஜந்தர் மந்தருக்கு வருமாறு கேட்டுக்கொள்கிறேன்.

எங்கள் இயக்கம் இங்கிருந்து தொடரும், ஜூலை 20-ம் தேதி திட்டமிட்டுள்ள எங்கள் பேரணியையும் தொடர்ந்து நடத்துவோம்

என்று தெரிவித்தார்.

இதே நாளில் முன்னதாக, தனது 20 நாள் உண்ணாவிரதத்தை நிறைவு செய்த சோனம் வாங்சுக் டெல்லி காவல்துறையினரால் சப்தர்ஜங் மருத்துவமனைக்கு கொண்டு செல்லப்பட்டார்.

வாங்சுக் மற்றும் அவரது ஆதரவாளர்கள் ஜூலை 20-ம் தேதி நாடாளுமன்றத்தை நோக்கி பேரணி நடத்த திட்டமிட்டிருந்த நிலையில், அதற்கு இரண்டு நாட்களுக்கு முன்பு இந்த சம்பவம் நிகழ்ந்துள்ளது.

Hindusthan Samachar / vidya.b