இமாச்சலப் பிரதேசம், 18 ஜூலை (ஹி.ச.)

இந்திய சுதந்திரப் போராட்டத்தின் அடையாளமாகத் திகழும் வந்தே மாதரம் பாடலுக்கும், பிற தேசிய சின்னங்களுக்கும் பொதுமக்கள் அதிக மரியாதை அளிக்க வேண்டும் என்றும், அதுகுறித்த விழிப்புணர்வை அதிகரிக்க வேண்டும் என்றும் இமாச்சலப் பிரதேச ஆளுநர் காவிந்தர் குப்தா வலியுறுத்தியுள்ளார்.

அரசியலமைப்புப் பதவியில் ஒரு ஆண்டை நிறைவு செய்ததையொட்டி இன்று பேசிய அவர் கூறியதாவது,

இந்திய சுதந்திர இயக்கத்தில் வந்தே மாதரம் தனித்துவமான இடத்தைப் பெற்றுள்ளது. நாட்டின் சுதந்திரத்திற்காகப் போராடியபோது நூற்றுக்கணக்கான சுதந்திரப் போராட்ட வீரர்கள் இதிலிருந்து உத்வேகம் பெற்றனர்.

அது தேசபக்தி மற்றும் தேசிய ஒற்றுமையின் வலுவான அடையாளங்களில் ஒன்றாகத் தொடர்கிறது.

சில நாட்களுக்கு முன்பு, இந்திய உயர் ஆய்வு நிறுவனத்தில் நடைபெற்ற கண்காட்சி ஒன்றைப் பார்த்தேன். அதில் வந்தே மாதரத்துடன் தொடர்புடைய முக்கியமான பகுதிகளை நீக்கவோ அல்லது அதன் முக்கியத்துவத்தைக் குறைக்கவோ முயற்சிகள் மேற்கொள்ளப்பட்டதாக விளக்கப்பட்டிருந்தது.

இத்தகைய முயற்சிகள் நமது தேசிய பாரம்பரியத்தின் முக்கியமான ஒரு பகுதியை பலவீனப்படுத்துகின்றன.

கிட்டத்தட்ட 150 ஆண்டுகளுக்குப் பிறகு, வந்தே மாதரம் மற்றும் அதன் வரலாற்று முக்கியத்துவம் குறித்து மக்களுக்கு அறிமுகப்படுத்த புதிய முயற்சிகள் மேற்கொள்ளப்படுகின்றன. இத்தகைய முயற்சிகள் ஊக்குவிக்கப்பட வேண்டும்.

தேசிய பாடலுடன் தொடர்புடைய தியாகங்களை மக்கள், குறிப்பாக இளைய தலைமுறையினர் புரிந்து கொள்ள வேண்டும். கல்வி கண்காட்சிகள் மற்றும் விழிப்புணர்வு நிகழ்ச்சிகள் இந்தப் பாரம்பரியத்தைப் பாதுகாக்க உதவும்.

தேசிய கீதமும், வந்தே மாதரமும் தேசபக்தியையும், தேசிய ஒற்றுமையையும் ஊக்குவிக்கின்றன. ஒவ்வொரு குடிமகனும் இந்த தேசிய சின்னங்களை மதித்து, அவை பிரதிநிதித்துவப்படுத்தும் விழுமியங்களை நிலைநிறுத்த வேண்டும்.

நமது தேசிய சின்னங்களின் கண்ணியத்தைப் பாதுகாக்க சட்ட விதிகள் ஏதேனும் கொண்டுவரப்பட்டால், அவை தேசிய மரியாதையையும், பொறுப்புணர்வையும் வலுப்படுத்தும் நோக்கில் பார்க்கப்பட வேண்டும்.

குடிமக்கள் ஒன்றிணைந்து நாட்டின் சின்னங்கள், விழுமியங்கள் மற்றும் அரசியலமைப்பு இலட்சியங்களை மதிக்கும்போது, நாடே வலுவடைகிறது.

இவ்வாறு அவர் கூறினார்.

Hindusthan Samachar / vidya.b