புதுடெல்லி, 27 ஜூலை (ஹி.ச.)

புதுடெல்லியில் உள்ள ஜந்தர் மந்தரில் நடைபெற்ற மாணவர் போராட்டங்கள் மற்றும் ஜூலை 20 அன்று நடந்த 'சன்சத் சலோ' பேரணியில் ஏற்பட்ட வன்முறையின் போது பிரதமர் நரேந்திர மோடிக்கு எதிராக தரக்குறைவான வார்த்தைகளில் ஏராளமான பதிவுகள் பல்வேறு சமூக ஊடக தளங்களில் பரவியதாக டெல்லி காவல்துறை தெரிவித்துள்ளது.

அது போன்ற ஆட்சேபகரமான மற்றும் தரக்குறைவான கருத்துகள் அடங்கிய பதிவுகள் மற்றும் வீடியோக்களை நீக்குமாறு பல சமூக ஊடக தளங்களுக்கு டெல்லி காவல்துறை உத்தரவிட்டுள்ளதாக அதிகாரிகள் இன்று தெரிவித்தனர்.

இத்தகைய உள்ளடக்கங்களைக் கண்டறிய டெல்லி காவல்துறையின் சமூக ஊடக கண்காணிப்புக் குழு தொடர்ந்து ஆன்லைன் தளங்களை கண்காணித்து வருவதாக அதிகாரிகள் கூறினர்.

ஆட்சேபகரமான பதிவுகள் அடையாளம் காணப்பட்டவுடன், அவற்றை நீக்குமாறு சம்பந்தப்பட்ட சமூக ஊடக நிறுவனங்களுக்கு நோட்டீஸ் அனுப்பப்படுகிறது.

இந்த நோட்டீஸ்களைத் தொடர்ந்து பிரதமருக்கு எதிரான தரக்குறைவான கருத்துகள் மற்றும் மோசமான வார்த்தைகள் அடங்கிய பல பதிவுகள் மற்றும் வீடியோக்கள் ஏற்கனவே நீக்கப்பட்டுள்ளதாக காவல்துறை தரப்பில் தெரிவிக்கப்பட்டது.

போராட்டங்கள் தொடர்பான ஆன்லைன் நடவடிக்கைகளை சைபர் மற்றும் சமூக ஊடகக் குழுக்கள் உன்னிப்பாகக் கவனித்து வருவதாகவும், விதிமுறைகளை மீறும் மேலும் ஆட்சேபகரமான பதிவுகளைக் கண்டறிந்து உரிய நடவடிக்கை எடுக்கப்படும் என்றும் போலீசார் கூறினர்.

நீட் மற்றும் சிபிஎஸ்இ தேர்வுகளில் முறைகேடுகளைக் கண்டித்து மாணவர்கள் ஜூலை 20 அன்று ஜந்தர் மந்தரில் இருந்து நாடாளுமன்றத்தை நோக்கி நடத்திய 'சலோ சன்சத்' பேரணியின் போது பாதுகாப்புப் படையினருடன் மோதல் ஏற்பட்டதைத் தொடர்ந்து அரசியல் பதற்றம் அதிகரித்துள்ள நிலையில் இந்த நடவடிக்கை எடுக்கப்பட்டுள்ளது.

இந்த போராட்டங்களின் போது குறைந்தது 130 காவல்துறையினரும் சுமார் 65 மாணவர்களும் காயமடைந்ததாகவும், வன்முறை தொடர்பாக 15 முதல் தகவல் அறிக்கைகள் பதிவு செய்யப்பட்டுள்ளதாகவும் டெல்லி காவல்துறை வட்டாரங்கள் தெரிவித்தன.

போராட்டம் தீவிரமடைந்ததைத் தொடர்ந்து ஜந்தர் மந்தர் பகுதியில் தினமும் சுமார் 10,000 பேர் கூடி வரும் நிலையில், அப்பகுதியில் சுமார் 3,000 காவலர்கள் பாதுகாப்புப் பணியில் ஈடுபடுத்தப்பட்டுள்ளனர்.

போராட்டக் களத்திற்குள் நுழையும் சமூக விரோத கும்பலை அடையாளம் காண முக அடையாளம் காணும் கேமராக்கள் (FRS) பயன்படுத்தப்படுவதாகவும், இதன் மூலம் குற்றப் பின்னணி கொண்ட 2,000 க்கும் மேற்பட்ட நபர்கள் அடையாளம் காணப்பட்டுள்ளதாகவும் டெல்லி காவல்துறை தெரிவித்துள்ளது.

Hindusthan Samachar / vidya.b