சென்னை, 31 ஜூலை (ஹி.ச.)

பீட்ரூட் என்பது மண்ணுக்கு அடியில் விளையும் ஒரு சிறந்த கிழங்கு வகை காய்கறியாகும். இதன் அடர் சிவப்பு நிறமும், இனிப்பு சுவையும் இதற்கு தனித்துவமான இடத்தை அளிக்கின்றன.

பயிரிடும் முறை:

பீட்ரூட் பயிரை முறையான பராமரிப்புடன் சாகுபடி செய்தால் குறைந்த நாட்களில் அதிக லாபம் பெற முடியும். பீட்ரூட் ஒரு குளிர் காலப் பயிராகும். 18°C முதல் 21°C வரையிலான வெப்பநிலை இதன் வளர்ச்சிக்கு மிகவும் ஏற்றது.

நல்ல வடிகால் வசதி கொண்ட, மணல் கலந்த களிமண் அல்லது இருமண்பாடு நிலங்கள் இதற்கு உகந்தவை. மண்ணின் கார அமிலத்தன்மை (pH) 6.0 முதல் 7.0 வரை இருக்க வேண்டும்.

நிலத்தை 3 அல்லது 4 முறை நன்றாக உழுது, கட்டிகளை உடைத்து சமன்படுத்த வேண்டும்.

பிறகு 30 செ.மீ இடைவெளியில் பார்சால் (Ridges and Furrows) அமைக்க வேண்டும்.

ஒரு ஹெக்டேருக்கு சுமார் 6 முதல் 7 கிலோ விதைகள் தேவைப்படும்.

விதைகளை 10 செ.மீ இடைவெளியில், 2 செ.மீ ஆழத்தில் பார்ப் பக்கங்களில் விதைக்க வேண்டும். விதைப்பதற்கு முன் விதைகளை 12 மணி நேரம் நீரில் ஊற வைத்தால் முளைப்புத் திறன் அதிகரிக்கும்.

விதைத்தவுடன் ஒரு தண்ணீரும், உயிர் தண்ணீர் மூன்றாம் நாளும் பாய்ச்ச வேண்டும். அதன் பின் மண்ணின் ஈரப்பதத்திற்கு ஏற்ப வாரத்திற்கு ஒருமுறை நீர் பாய்ச்சினால் போதுமானது.

அடியுரமாக மக்கிய தொழு உரம் (ஹெக்டேருக்கு 20 டன்) இட வேண்டும். நடவு செய்த 30 நாட்களுக்குப் பிறகு தழைச்சத்து உரங்களை மேலுரமாக இட வேண்டும்.பயிரின் ஆரம்ப காலத்தில் களைகள் இல்லாமல் பார்த்துக் கொள்வது அவசியம். நடவு செய்த 20 மற்றும் 40-வது நாட்களில் கைக்களை எடுக்க வேண்டும்.

விதைத்த 75 முதல் 90 நாட்களில் பீட்ரூட் அறுவடைக்குத் தயாராகிவிடும். கிழங்குகள் நல்ல வடிவத்தை அடைந்தவுடன், இலைகளுடன் சேர்த்து பிடுங்கி எடுத்து, பின்னர் இலைகளை வெட்டி அகற்றிவிட்டு விற்பனைக்கு அனுப்பலாம்.

பீட்ரூட்டின் பயன்கள்:

பீட்ரூட்டில் வைட்டமின்கள், தாதுக்கள் மற்றும் ஆன்டி-ஆக்ஸிடன்ட்டுகள் நிறைந்துள்ளன.பீட்ரூட்டில் இரும்புச்சத்து அதிகளவில் உள்ளது. இது இரத்தத்தில் சிவப்பணுக்களின் எண்ணிக்கையை அதிகரித்து, இரத்த சோகை வராமல் தடுக்கிறது.

இதில் உள்ள இயற்கை நைட்ரேட்டுகள் இரத்த நாளங்களை விரிவடையச் செய்து, உயர் இரத்த அழுத்தத்தைக் குறைக்க உதவுகின்றன. உடற்பயிற்சி செய்பவர்கள் அல்லது விளையாட்டு வீரர்கள் பீட்ரூட் சாறு அருந்துவதால், உடலின் ஆக்ஸிஜன் பயன்பாடு அதிகரித்து சோர்வின்றி செயல்பட முடிகிறது.

இதில் உள்ள நார்ச்சத்து (Fiber) மலச்சிக்கல் சிக்கலைத் தீர்த்து, குடல் ஆரோக்கியத்தை மேம்படுத்துகிறது. மூளைக்குச் செல்லும் இரத்த ஓட்டத்தை சீராக்குவதன் மூலம், ஞாபக மறதி போன்ற நோய்கள் வராமல் தடுக்கிறது.

இரத்தத்தைச் சுத்திகரிக்கும் தன்மை கொண்டதால், முகப்பருக்களை நீக்கி சருமத்திற்கு இயற்கையான பொலிவைத் தருகிறது.

சரியான தொழில்நுட்ப முறைகளைப் பின்பற்றி பீட்ரூட் பயிரிடுவதன் மூலம் விவசாயிகள் நல்ல மகசூலையும் வருமானத்தையும் பெறலாம்.

அதே வேளையில், நாம் அன்றாட உணவில் பீட்ரூட்டைச் சேர்த்துக் கொள்வதன் மூலம் நமது ஆரோக்கியத்தை மேம்படுத்திக் கொள்ள முடியும்.

Hindusthan Samachar / vidya.b