புதுடெல்லி, 05 ஜூலை (ஹி.ச.)

சத்தீஸ்கரின் ராய்ப்பூரில் பத்ம விபூஷன் விருது பெற்றவரும் புகழ்பெற்ற பாண்டவானி (Pandavani) கலை நிபுணருமான தீஜன் பாய் நீண்ட கால உடல்நலக்குறைவால் தனது 72-வது வயதில் இன்று காலமானார்.

மறைந்த மூத்த கலைஞரான தீஜன் பாய்க்கு குடியரசுத் தலைவர் திரௌபதி முர்மு மற்றும் பிரதமர் நரேந்திர மோடி ஆகியோர் இன்று அஞ்சலி செலுத்தினர்.

இதுகுறித்து,குடியரசுத் தலைவர் திரௌபதி முர்மு எக்ஸ்' (X) தளத்தில் கூறியிருப்பதாவது,

புகழ்பெற்ற பாண்டவானி கலைஞர் திருமதி தீஜன் பாய் அவர்களின் மறைவுச் செய்தி மிகுந்த மனவேதனை அளிக்கிறது.

தனது கம்பீரமான குரல், மேடையில் வெளிப்படுத்திய ஆளுமை மற்றும் தனித்துவமான கலைப் படைப்பு பாணி ஆகியவற்றின் மூலம் மகாபாரதக் கதைகளுக்கு அவர் உயிர் கொடுத்தார்.

தனது சிறப்பான திறமை, தளராத அர்ப்பணிப்பு மற்றும் பல ஆண்டுகால தீவிர பயிற்சி ஆகியவற்றின் மூலம், சத்தீஸ்கரின் செழுமையான பாண்டவானி கலை மரபிற்கு இந்தியாவிலும் வெளிநாடுகளிலும் அங்கீகாரத்தைப் பெற்றுத் தந்தார்.

இந்தியாவின் கலாச்சார பாரம்பரியத்தைப் பாதுகாப்பதிலும் மேம்படுத்துவதிலும் அவர் ஆற்றிய விலைமதிப்பற்ற பங்களிப்பு என்றும் நினைவுகூரப்படும்.

அவரது அன்புக்குரியவர்களுக்கும் ரசிகர்களுக்கும் எனது ஆழ்ந்த இரங்கலைத் தெரிவித்துக் கொள்கிறேன்.

என்று கூறியுள்ளார்.

தீஜன் பாயின் மறைவுக்கு இரங்கல் தெரிவித்த பிரதமர் மோடி, சத்தீஸ்கரின் பாரம்பரிய பாண்டவானி கலை வடிவத்திற்கு அவர் உலகளாவிய அங்கீகாரத்தைப் பெற்றுத் தந்தார் என்று குறிப்பிட்டார்.

'எக்ஸ்' தளத்தில் இரங்கல் செய்தி பதிவிட்டுள்ள பிரதமர் மோடி அதில் கூறியிருப்பதாவது,

புகழ்பெற்ற பாண்டவானி கலைஞர் தீஜன் பாய் அவர்களின் மறைவு எனக்கு மிகுந்த வருத்தத்தை அளிக்கிறது. தனது சிறப்பான கலை நிகழ்ச்சிகள் மூலம், சத்தீஸ்கரின் இந்தக் நாட்டுப்புறக் கலை வடிவத்திற்கு உலகம் முழுவதும் ஒரு தனித்துவமான அடையாளத்தை அவர் பெற்றுத் தந்தார்.

அவரது மறைவு கலை மற்றும் கலாச்சார உலகிற்கு ஈடுசெய்ய முடியாத இழப்பாகும். துயரத்தின் இந்த வேளையில், அவரது குடும்பத்தினருக்கும் ரசிகர்களுக்கும் எனது இரங்கலைத் தெரிவித்துக் கொள்கிறேன். ஓம் சாந்தி!

என்று கூறியுள்ளார்.

Hindusthan Samachar / vidya.b