இடுக்கி, 01 ஆகஸ்ட் (ஹி.ச)

கனமழை காரணமாக கேரள மாநிலம் இடுக்கி மாவட்டத்தில் இன்று பல்வேறு இடங்களில் நிலச்சரிவு ஏற்பட்டுள்ளது. இதில் ஒருவர் உயிரிழந்துள்ளதாகவும், மற்றொருவர் மண்ணில் புதையுண்டிருக்கலாம் என அஞ்சப்படுவதாகவும் தகவல் வெளியாகியுள்ளது.

வாகமண் பகுதியில் வீட்டின் மீது மண் சரிந்து விழுந்ததில் வைக்கம் பகுதியைச் சேர்ந்த பிரபாகரன் நாயர் உயிரிழந்தார்.

அவர் உயிரிழந்தது உறுதி செய்யப்பட்டுள்ள நிலையில், கடினமான நிலப்பரப்பு காரணமாக அவரது உடலை மீட்கும் பணியில் மீட்புக் குழுவினர் தொடர்ந்து ஈடுபட்டு வருகின்றனர்.

இதேபோல், அடூர்மலா பகுதியில் ஏற்பட்ட மற்றொரு நிலச்சரிவில் ஒருவர் மண் மற்றும் பாறைக் குவியலுக்குள் சிக்கியிருக்கலாம் என அதிகாரிகள் தெரிவித்துள்ளனர். அங்கும் தேடுதல் மற்றும் மீட்புப் பணிகள் தீவிரமாக நடைபெற்று வருகின்றன.

கனமழையால் போக்குவரத்தும் கடுமையாக பாதிக்கப்பட்டுள்ளது.

அடிமாலி அருகே மாச்சிபிளாவு பகுதியில் கொச்சி - தனுஷ்கோடி தேசிய நெடுஞ்சாலையில் பெரிய அளவில் நிலச்சரிவு ஏற்பட்டது.

இதில் சரிந்து விழுந்த மண்ணில் ஒரு கார் மற்றும் டாரஸ் லாரி சிக்கிக்கொண்டன. இதையடுத்து அந்த நெடுஞ்சாலையில் போக்குவரத்து முற்றிலுமாக நிறுத்தப்பட்டுள்ளது.

மீட்புப் பணியாளர்கள் மற்றும் மாவட்ட நிர்வாகத்தினர் சம்பவ இடங்களில் முகாமிட்டு நெடுஞ்சாலையை சீரமைக்கும் பணியிலும், காணாமல் போனவர்களைத் தேடும் பணியிலும் ஈடுபட்டுள்ளனர். மழை தொடர்ந்து பெய்து வருவதால் நிலச்சரிவு அபாயம் உள்ள பகுதிகளில் வசிக்கும் மக்கள் எச்சரிக்கையுடன் இருக்குமாறு மாவட்ட நிர்வாகம் அறிவுறுத்தியுள்ளது.

இதற்கிடையே, இந்திய வானிலை ஆய்வு மையம் இன்று பல மாவட்டங்களுக்கு சிவப்பு எச்சரிக்கை விடுத்துள்ளது. அடுத்த இரண்டு முதல் மூன்று மணி நேரத்தில் மணிக்கு சுமார் 60 கி.மீ வேகத்தில் பலத்த காற்றுடன் இடி மின்னல் மற்றும் மணிக்கு 15 மி.மீ-க்கும் அதிகமான கனமழை பெய்யக்கூடும் என எச்சரிக்கப்பட்டுள்ளது.

குஜராத் மற்றும் கேரள மாநிலங்களில் இந்த எச்சரிக்கை விடுக்கப்பட்டுள்ளது. கேரளாவில் ஆலப்புழா, எர்ணாகுளம், இடுக்கி, கோட்டயம் மற்றும் பத்தனம்திட்டா மாவட்டங்களுக்கு சிவப்பு எச்சரிக்கை பொருந்தும்.

மேலும், கேரளா, குஜராத், மகாராஷ்டிரா மற்றும் அசாம் மாநிலங்களின் சில பகுதிகளுக்கு ஆரஞ்சு எச்சரிக்கையும் விடுக்கப்பட்டுள்ளது. மணிக்கு 40 முதல் 60 கி.மீ வேகத்தில் காற்றுடன் இடி மின்னல் மற்றும் மணிக்கு 5 முதல் 15 மி.மீ அளவில் மிதமான மழை பெய்யக்கூடும் என தெரிவிக்கப்பட்டுள்ளது.

கேரளாவில் கண்ணூர், காசர்கோடு, கொல்லம், கோழிக்கோடு, லட்சத்தீவு, மலப்புரம், பாலக்காடு, திருவனந்தபுரம், திருச்சூர் மற்றும் வயநாடு ஆகிய மாவட்டங்களுக்கு ஆரஞ்சு எச்சரிக்கை விடுக்கப்பட்டுள்ளது.

Hindusthan Samachar / vidya.b