ஐதராபாத் , 19 ஆகஸ்ட் (ஹி.ச.)

தெலங்கானாவில் தகுதியுள்ள அனைத்து கீத தொழிலாளர்களுக்கும் ஓய்வூதியம் வழங்கப்படும் என்று முதல்-மந்திரி ரேவந்த் ரெட்டி அறிவித்தார்.

ஐதராபாத்தில் சர்தார் சர்வாய் பாபன்னா கவுட் சிலையை திறந்து வைத்த பின்னர் நடைபெற்ற பொதுக்கூட்டத்தில் ரேவந்த் ரெட்டி பேசியதாவது:-

கீத தொழிலாளர்களின் வாழ்வாதாரத்தை பாதுகாப்பது அரசின் முக்கிய பொறுப்பு.

அவர்களின் தொழிலை மேம்படுத்தும் வகையில் அரசு நிலங்கள் மற்றும் கால்வாய் கரையோரங்களில் ஈத்தா, பனை மரங்கள் அதிக அளவில் வளர்க்கப்படும். இதன் மூலம் கீத தொழிலாளர்களுக்கு தொடர்ந்து வேலைவாய்ப்பும், வருமானமும் கிடைக்கும்.

விபத்தில் உயிரிழக்கும் கீத தொழிலாளர்களின் குடும்பங்களுக்கு அரசு ஏற்கனவே ரூ.5 லட்சம் நிவாரணம் வழங்கி வருகிறது. தகுதியுள்ள அனைத்து கீத தொழிலாளர்களுக்கும் ஓய்வூதியம் வழங்குவதற்கும் நடவடிக்கை எடுக்கப்படும்.

குழந்தைகளின் கல்வி புறக்கணிப்பு

முந்தைய கே.சி.ஆர்.

தலைமையிலான பி.ஆர்.எஸ். அரசு பாரம்பரிய தொழில்களை ஊக்குவிப்பதாக கூறினாலும், அந்த தொழில்களைச் சேர்ந்த மக்களின் குழந்தைகளின் கல்வியில் போதிய கவனம் செலுத்தவில்லை என்று ரேவந்த் ரெட்டி குற்றம்சாட்டினார்.

காங்கிரஸ் ஆட்சியில் பிற்படுத்தப்பட்ட மற்றும் பின்தங்கிய சமூகங்களைச் சேர்ந்த குழந்தைகள் கல்வி கற்று டாக்டர்கள், வக்கீல்கள், ஐ.ஏ.எஸ். அதிகாரிகளாக முன்னேறுவதற்கு தேவையான வாய்ப்புகள் உருவாக்கப்படும். இதுவே உண்மையான சமூக நீதி என்றும் அவர் கூறினார்.

ஹரீஷ் ராவுக்கு எதிராக குற்றச்சாட்டு

பி.ஆர்.எஸ். மூத்த தலைவர் ஹரீஷ் ராவையும் ரேவந்த் ரெட்டி கடுமையாக விமர்சித்தார்.

தெலங்கானாவில் வறட்சி ஏற்படவும், விவசாயிகள் பாதிக்கப்படவும் கர்நாடகா மற்றும் தமிழ்நாட்டுக்கு சென்று ஹரீஷ் ராவ் க்ஷுத்ர பூஜைகள் செய்வதாக அவர் குற்றம்சாட்டினார்.

இத்தகைய செயல்களில் ஈடுபடுபவர்களுக்கு எதிராக கடுமையான நடவடிக்கை எடுக்க வேண்டும் என்று அவர் ஆவேசமாக தெரிவித்தார்.

117 தொகுதிகளில் வெற்றி

அடுத்த சட்டமன்றத் தேர்தலில் காங்கிரஸ் கட்சி 117 தொகுதிகளில் வெற்றி பெற்று மீண்டும் ஆட்சி அமைக்கும் என்று ரேவந்த் ரெட்டி நம்பிக்கை தெரிவித்தார்.

மேலும், கவுட் சமூகத்தினர் காங்கிரஸ் கட்சிக்கு முழுமையான ஆதரவு அளிக்க வேண்டும் என்றும் அவர் கேட்டுக்கொண்டார்.

Hindusthan Samachar / M.DEEPAK RAJA