சியோல், 13 செப்டம்பர் (ஹி.ச.)

தென்கொரியாவின் திருத்தப்பட்ட உளவுச் சட்டம் இன்று முதல் அமலுக்கு வருகிறது. நாட்டின் தேசிய பாதுகாப்பு உத்தியில் ஒரு திருப்புமுனையாக கருதப்படும் இந்த சட்டத் திருத்தம், உளவு குற்றங்களின் வரம்பை பெருமளவில் விரிவுபடுத்தியுள்ளது.

இதுவரை, தென்கொரிய குற்றவியல் சட்டத்தின் 98-வது பிரிவின் கீழ், வடகொரியா என்ற எதிரி நாட்டிற்கு பயனளிக்கும் வகையில் ராணுவ ரகசியங்களை சேகரிப்பது அல்லது கசியவிடுவது மட்டுமே உளவு குற்றமாக கருதப்பட்டது.

ஆனால் புதிய திருத்தத்தின்படி, இனி எந்தவொரு வெளிநாடு அல்லது அதற்கு இணையான அமைப்பிற்கும் பயனளிக்கும் வகையில் செயல்படுவதும் உளவு குற்றமாகும். இதன் மூலம் நீண்ட காலமாக இருந்து வந்த சட்ட ஓட்டை அடைக்கப்பட்டுள்ளது.

இந்த திருத்தம் கடந்த பிப்ரவரி 26-ம் தேதி தேசிய சட்டமன்றத்தில் நிறைவேற்றப்பட்டது. தற்போதைய சட்டத்தின் கீழ் தொழில்நுட்பங்களை கசியவிடுவோர் மீது கடுமையான தண்டனை விதிக்க முடியாமல் நீதிமன்றங்கள் தடுமாறி வந்தன என்ற விமர்சனத்தை அடுத்தே இந்த மாற்றம் கொண்டுவரப்பட்டது.

இந்த சட்ட விரிவாக்கத்தின் முக்கிய நோக்கம், நாட்டின் முக்கிய தொழில்நுட்பங்களை பாதுகாப்பதாகும். குறிப்பாக குறைக்கடத்திகள், டிஸ்பிளே, பேட்டரிகள் மற்றும் செயற்கை நுண்ணறிவு போன்ற துறைகளில் அதிகரித்து வரும் சர்வதேச போட்டியை சமாளிக்க சியோல் முனைப்பு காட்டுகிறது.

சாம்சங் எலக்ட்ரானிக்ஸ் மற்றும் எஸ்கே ஹைனிக்ஸ் போன்ற உலகின் முன்னணி சிப் நிறுவனங்களை கொண்டுள்ள தென்கொரியா, சீனாவின் வேகமாக வளர்ந்து வரும் போட்டியில் இருந்து தனது மேம்பட்ட நினைவக தொழில்நுட்பத்தை பாதுகாக்க விரும்புகிறது.

தேசிய புலனாய்வு அமைப்பு இந்த திருத்தத்தை வரவேற்றுள்ளது. இது தொழில்நுட்பங்கள் வெளியே கசிவதை தடுக்கும் திறனை வலுப்படுத்தும் என்று அந்த அமைப்பு தெரிவித்துள்ளது.

சட்ட மற்றும் பாதுகாப்பு நிபுணர்களும் இதனை ஆதரித்துள்ளனர். இதுவரை தொழில்துறை தொழில்நுட்ப கசிவு வழக்குகள் இலகுவான தண்டனைகளுடன் தப்பி வந்த நிலையில், புதிய சட்டம் தொழில்துறை உளவுக்கு எதிரான தடுப்பு நடவடிக்கையை வலுப்படுத்தும் என்று அவர்கள் கருதுகின்றனர்.

புதிய சட்டத்தின்படி, முக்கிய தொழில்நுட்பங்கள் தொடர்பான உளவு குற்றங்களுக்கு குறைந்தபட்சம் மூன்று ஆண்டுகள் சிறை தண்டனை விதிக்கப்படும், அதிகபட்சமாக 15 முதல் 30 ஆண்டுகள் வரை தண்டனை வழங்க வழிவகை உள்ளது. அதிகரித்து வரும் உலகளாவிய வர்த்தக போட்டிகளுக்கு மத்தியில், தனது தொழில்நுட்ப மேலாதிக்கத்தை தக்கவைத்துக் கொள்ள சியோல் மேற்கொண்டுள்ள தீவிர முயற்சியாக இது பார்க்கப்படுகிறது.

Hindusthan Samachar / vidya.b