லடாக், 26 செப்டம்பர் (ஹி.ச)

மூன்று நாள் ஆண்டுதோறும் நடத்தப்படும் லடாக் திருவிழா 2026 இன்று செப்டம்பர் 26-ம் தேதி லேவில் தொடங்கியது.

இந்த ஆண்டு திருவிழாவின் கலாச்சார நிகழ்ச்சிகள் விரிவுபடுத்தப்பட்டு, நாடு முழுவதிலுமிருந்து தேர்ந்தெடுக்கப்பட்ட கலைக்குழுக்கள் பங்கேற்கின்றன என சுற்றுலா மற்றும் கலாச்சாரத்துறை செயலாளர் சஞ்சித் ரோட்ரிக்ஸ் தெரிவித்தார்.

இது குறித்து சஞ்சித் ரோட்ரிக்ஸ் செய்தியாளர்களிடம் கூறுகையில்,

இன்று இரவு 7 மணிக்கு நடைபெறும் தொடக்க விழாவில் ஷில்லாங் சேம்பர் குழுவினர் பங்கேற்று பாட உள்ளனர். 25 பேர் கொண்ட இந்தக் குழுவினர் ஏற்கனவே லேவிற்கு வந்து ஒத்திகையைத் தொடங்கியுள்ளனர்.

ஷில்லாங் சேம்பர் குழுவினரின் நேரடி நிகழ்ச்சியைக் காண தற்போது லே மற்றும் லடாக்கில் உள்ள சுற்றுலாப் பயணிகள் மற்றும் உள்ளூர் மக்களிடையே மிகுந்த உற்சாகம் நிலவுகிறது.

திருவிழாவின் கலாச்சார பரிமாற்றத் திட்டம் மற்றும் சிறப்பு மாநிலம் முயற்சியின் ஒரு பகுதியாக, அந்தமான் நிக்கோபார் தீவுகளில் இருந்து 14 பேர் கொண்ட சிறப்புக் கலைக்குழு ஒன்றும் அழைக்கப்பட்டுள்ளது.

அவர்களும் ஒத்திகையில் ஈடுபட்டுள்ளனர், அடுத்த மூன்று நாட்களில் லடாக் மக்களும் சுற்றுலாப் பயணிகளும் அவர்களின் கலாச்சார நிகழ்ச்சிகளைக் காணும் வாய்ப்பைப் பெறுவார்கள்.

மேலும், வடக்கு மண்டல கலாச்சார மையத்துடன் இணைந்து ஒரு கலவை இசை நிகழ்ச்சிக்கும் ஏற்பாடு செய்யப்பட்டுள்ளது. இதில் வடக்கு மண்டல மாநிலங்களைச் சேர்ந்த கலைஞர்கள் அடங்கிய 47 பேர் கொண்ட குழுவினர் பங்கேற்கின்றனர். வட இந்திய கலாச்சாரங்களின் கலவையை பிரதிபலிக்கும் இந்த சிறப்பு நிகழ்ச்சியும் லடாக் திருவிழாவில் இடம்பெறும்.

இறுதியாக, ஒவ்வொரு மாவட்டத்தின் நிகழ்ச்சிகளையும் முன்னிலைப்படுத்தும் வகையிலும், வளர்ந்து வரும் இளம் கலைஞர்களுக்கு ஒரு தளத்தை வழங்கும் வகையிலும் மூன்று நாள் நிகழ்ச்சி வடிவமைக்கப்பட்டுள்ளது.

இவ்வாறு அவர் கூறினார்.

Hindusthan Samachar / vidya.b