புதுடெல்லி, 27 செப்டம்பர் (ஹி.ச.)

உலக சுற்றுலா தினம் இன்று சுற்றுலாவை மறுவடிவமைக்க டிஜிட்டல் நிகழ்ச்சி நிரல் மற்றும் செயற்கை நுண்ணறிவு என்ற கருப்பொருளில் கடைபிடிக்கப்படுகிறது.

சுற்றுலாத் துறையை மாற்றுவதில் தொழில்நுட்பத்தின் பங்கை மையமாகக் கொண்டு இந்த கருப்பொருள் அமைந்திருந்தது.

2023-24 ஆம் ஆண்டில் சுற்றுலாத் துறை இந்தியாவின் மொத்த உள்நாட்டு உற்பத்தியில் 5.22 சதவீத பங்களிப்பை அளித்ததாகவும், 8.46 கோடி வேலைவாய்ப்புகளை உருவாக்கியதாகவும் அரசு தெரிவித்துள்ளது.

உள்நாட்டு சுற்றுலாப் பயணிகளின் வருகை 2021 ஆம் ஆண்டில் 67.7 கோடியாக இருந்த நிலையில், 2025 ஆம் ஆண்டில் 428.55 கோடியாக கணிசமாக அதிகரித்துள்ளது.

அதே காலகட்டத்தில் வெளிநாட்டு சுற்றுலாப் பயணிகளின் வருகை 0.1 கோடியில் இருந்து 2.53 கோடியாக உயர்ந்துள்ளது. சுற்றுலா மூலமான அந்நியச் செலாவணி வருவாயும் 2021 ஆம் ஆண்டில் ரூ.63,978 கோடியாக இருந்த நிலையில், 2025 ஆம் ஆண்டில் ரூ.2,76,831 கோடியாக அதிகரித்துள்ளது.

பயண அனுபவத்தை மேலும் தனிப்பயனாக்கப்பட்டதாகவும், அணுகக்கூடியதாகவும், தடையற்றதாகவும் மாற்றுவதில் டிஜிட்டல் தளங்கள் மற்றும் செயற்கை நுண்ணறிவின் பங்கு அதிகரித்து வருவதை அரசு வலியுறுத்தியுள்ளது.

2014 ஆம் ஆண்டு 43 நாடுகளைச் சேர்ந்தவர்களுக்கு அறிமுகப்படுத்தப்பட்ட இந்தியாவின் இ-விசா வசதி தற்போது 172 நாடுகளுக்கு விரிவுபடுத்தப்பட்டுள்ளது.

இதன் மூலம் 88 சர்வதேச துறைமுகங்கள் வழியாக நுழைய அனுமதிக்கப்படுகிறது. தற்போது 78 சதவீத விசாக்கள் மின்னணு முறையில் வழங்கப்படுகின்றன.

சுமார் 95 சதவீத இ-விசா விண்ணப்பங்கள் 72 மணி நேரத்திற்குள் செயலாக்கப்படுகின்றன.

இன்கிரெடிபிள் இந்தியா டிஜிட்டல் தளம் கலாச்சாரம், பாரம்பரியம், சாகசம், உணவு, ஆரோக்கியம், கலை மற்றும் கைவினை, கிராமப்புற ஈர்ப்புகள் என பல்வேறு பிரிவுகளில் மெய்நிகர் அனுபவங்களை வழங்கும் வகையில் மேம்படுத்தப்பட்டுள்ளது. நிகழ்நேர வானிலை அறிவிப்புகள் மற்றும் நகரங்களை ஆராயும் வசதி போன்ற செயற்கை நுண்ணறிவு அம்சங்களையும் இது உள்ளடக்கியுள்ளது.

சுற்றுலா அமைச்சகம் தேசிய டிஜிட்டல் சுற்றுலா அடுக்கை அறிமுகப்படுத்த திட்டமிட்டுள்ளது. அதே நேரத்தில் தேகோ அப்னா தேஷ் 2.0 திட்டம் குறைவாக அறியப்பட்ட சுற்றுலா தலங்களை மேம்படுத்துவதை நோக்கமாகக் கொண்டுள்ளது.

மேலும், 2026-27 முதல் 2035-36 வரையிலான காலத்திற்கான மாற்றியமைக்கப்பட்ட உடான் திட்டத்தின் கீழ் சுற்றுலா உள்கட்டமைப்பை அரசு விரிவுபடுத்தி வருகிறது.

இதற்காக 100 விமான நிலையங்கள் மற்றும் 200 நவீன ஹெலிபேட்களை மேம்படுத்த ரூ.28,840 கோடி நிதி ஒதுக்கீடு செய்யப்பட்டுள்ளது.

இந்த நிலையில் சுற்றுலா தினத்தை முன்னிட்டு பாதுகாப்புத்துறை அமைச்சர் ராஜ்நாத் சிங் வாழ்த்து தெரிவித்துள்ளார்.

இது தொடர்பாக எக்ஸ் தளத்தில் அவர் வெளியிட்ட பதிவில்,

உலக சுற்றுலா தினத்தில் அனைவருக்கும் எனது மனமார்ந்த வாழ்த்துகள். பழமையான கோயில்கள் மற்றும் வரலாற்றுச் சின்னங்கள் முதல் இயற்கை அதிசயங்கள் மற்றும் கலாச்சார பாரம்பரியங்கள் வரை, இந்தியா தனது நாகரிக பாரம்பரியத்தின் வழியே உலகிற்கு இணையற்ற பயண அனுபவத்தை வழங்குகிறது.

பிரதமர் திரு நரேந்திர மோடி அவர்களின் தொலைநோக்கு தலைமையின் கீழ், இந்தியாவின் சுற்றுலாத் துறை புதிய உத்வேகத்தை கண்டு வருகிறது. இணைப்பு வசதிகள், உலகத்தரம் வாய்ந்த உள்கட்டமைப்பு, பாரம்பரிய பாதுகாப்பு மற்றும் இந்தியாவின் பன்முக சுற்றுலா வாய்ப்புகளை உலகிற்கு வெளிப்படுத்துவதில் அதிக முக்கியத்துவம் அளிக்கப்பட்டு வருகிறது.

இந்தியாவை வரவேற்கத்தக்க, பொறுப்புமிக்க மற்றும் உலகளவில் போற்றப்படும் சுற்றுலா தலமாக மாற்றுவதற்கான நமது கூட்டு முயற்சிகள் தொடரட்டும்.

என்று தெரிவித்தார்.

Hindusthan Samachar / vidya.b