புதுடெல்லி, 30 செப்டம்பர் (ஹி.ச.)

டெல்லி கான்ஸ்டிடியூஷன் கிளப்பில் இந்தியா கூட்டணி கட்சிகளின் ஆலோசனைக் கூட்டம் இன்று நடைபெற்றது.

இதில் காங்கிரஸ் மூத்த தலைவர் சோனியா காந்தி, மக்களவை எதிர்க்கட்சித் தலைவர் ராகுல் காந்தி, காங்கிரஸ் பொதுச்செயலாளர் கே.சி.வேணுகோபால், ஜம்மு-காஷ்மீர் முதலமைச்சர் ஒமர் அப்துல்லா, மார்க்சிஸ்ட் கம்யூனிஸ்ட் கட்சி பொதுச்செயலாளர் எம்.ஏ.பேபி, திரிணமூல் காங்கிரஸ் தலைவர் மம்தா பானர்ஜி, பிடிபி தலைவர் மெகபூபா முப்தி, தேசியவாத காங்கிரஸ் (சரத்பவார்) கட்சியைச் சேர்ந்த சுப்ரியா சூலே, மதிமுக பொதுச்செயலாளர் வைகோ, விசிக தலைவர் திருமாவளவன், ஆர்.ஜே.டி தலைவர் தேஜஸ்வி யாதவ் உள்ளிட்ட பல்வேறு கட்சிகளின் தலைவர்கள் மற்றும் பிரதிநிதிகள் பங்கேற்றனர்.

கூட்டத்தில், வாக்காளர் பட்டியல் சிறப்பு தீவிர திருத்தமான SIR நடைமுறையில் முறைகேடுகள் நடைபெற்றதாக இந்தியா கூட்டணி கட்சிகள் தெரிவித்த குற்றச்சாட்டுகள் குறித்து விவாதிக்கப்பட்டது.

மேலும், இதற்கு பொறுப்பேற்று தலைமை தேர்தல் ஆணையர் ஞானேஷ் குமார் பதவி விலக வேண்டும் என வலியுறுத்துவது என்றும் முடிவு செய்யப்பட்டதாக தெரிவிக்கப்பட்டுள்ளது.

தலைமை தேர்தல் ஆணையரை பதவியில் இருந்து நீக்கக் கோரும் தீர்மானத்தை நாடாளுமன்றத்தின் இரு அவைகளிலும் கொண்டு வருவதற்கான வரைவைத் தயாரிக்கவும் கூட்டத்தில் முடிவு செய்யப்பட்டதாக கூறப்படுகிறது.

மேலும், தேர்தல் ஆணையத்தின் செயல்பாடுகளை கண்டித்து டெல்லி ராம்லீலா மைதானத்தில் தொடங்கி நாடு முழுவதும் போராட்டங்களை நடத்தவும் முடிவு செய்யப்பட்டுள்ளது.

SIR நடைமுறையின்போது வாக்காளர் பட்டியலில் இருந்து நீக்கப்பட்டதாக கூறப்படும் வாக்காளர்கள் தொடர்பான விவகாரத்தில் உச்ச நீதிமன்றத்தில் தொடர்ந்து சட்டப் போராட்டம் நடத்தவும் இந்தியா கூட்டணி கட்சிகள் முடிவு செய்துள்ளன.

கூட்டத்துக்குப் பின்னர் செய்தியாளர்களிடம் பேசிய மதிமுக பொதுச்செயலாளர் வைகோ, வரும் அக்டோபர் 6-ஆம் தேதி இந்தியா கூட்டணி சார்பில் தலைமை தேர்தல் ஆணையத்தை நோக்கி பேரணி நடத்த முடிவு செய்யப்பட்டுள்ளதாக தெரிவித்தார்.

மேலும், அக்டோபர் 2-ஆம் தேதி முதல் மாவட்டங்கள் மற்றும் மாநிலங்கள் வாரியாக இந்தியா கூட்டணி மற்றும் அதன் ஆதரவு கட்சிகள் சார்பில் பேரணிகள் நடத்தப்படும் என்றும், தலைமை தேர்தல் ஆணையரை பதவி நீக்க வேண்டும், SIR நடைமுறையை ரத்து செய்ய வேண்டும் ஆகிய கோரிக்கைகளை வலியுறுத்தி இந்தப் போராட்டங்கள் நடைபெறும் என்றும் அவர் கூறினார்.

இந்தியா கூட்டணியில் இருந்து விலகிய கட்சிகள் உள்ளிட்ட அனைத்து எதிர்க்கட்சிகளையும் ஒன்றிணைத்து போராட்டங்களை நடத்த முடிவு செய்யப்பட்டுள்ளதாகவும் வைகோ தெரிவித்தார்.

இதனைத் தொடர்ந்து பேசிய விசிக தலைவர் திருமாவளவன், அக்டோபர் 2 முதல் 8-ஆம் தேதி வரை இந்தியா கூட்டணி சார்பில் ‘ஜனநாயகத்தை பாதுகாப்போம்’ என்ற முழக்கத்துடன் பேரணிகள் நடத்த முடிவு செய்யப்பட்டுள்ளதாக தெரிவித்தார்.

அக்டோபர் 6-ஆம் தேதி எதிர்க்கட்சிகளின் தலைவர்கள், பிரதிநிதிகள் மற்றும் நாடாளுமன்ற உறுப்பினர்கள் பங்கேற்கும் பேரணி தேர்தல் ஆணையத்தை நோக்கி நடைபெறும் என்றும் அவர் கூறினார்.

அக்டோபர் இரண்டாவது வாரத்தில் குடியரசுத் தலைவரை சந்தித்து, தலைமை தேர்தல் ஆணையர் பதவி விலக வேண்டும் என வலியுறுத்தவும் முடிவு செய்யப்பட்டுள்ளதாக திருமாவளவன் தெரிவித்தார்.

மேலும், தேர்தல் ஆணையம் தொடர்பாக உச்ச நீதிமன்றத்தில் நிலுவையில் உள்ள வழக்குகளை விரைந்து விசாரிக்க நடவடிக்கை எடுக்க வேண்டும் என்றும் வலியுறுத்த முடிவு செய்யப்பட்டுள்ளதாக அவர் கூறினார்.

தேர்தல் தொடர்பான பிரச்சினை ஒரு குறிப்பிட்ட அரசியல் கட்சியின் பிரச்சினை மட்டுமல்ல என்றும், அது நாட்டின் ஜனநாயகத்துடன் தொடர்புடைய விவகாரம் என்றும் திருமாவளவன் தெரிவித்தார்.

SIR நடைமுறை தொடர்பாக இந்தியா கூட்டணி கட்சிகள் பல்வேறு குற்றச்சாட்டுகளை முன்வைத்து வருவதாகவும், அவற்றுக்கு தேர்தல் ஆணையம் உரிய விளக்கம் அளிக்க வேண்டும் என்றும் அவர் கூறினார்.

தலைமை தேர்தல் ஆணையர் தொடர்பாக இரு தேர்தல் ஆணையர்கள் முன்வைத்ததாக கூறப்படும் குற்றச்சாட்டுகள் குறித்து இதுவரை உரிய மறுப்பு தெரிவிக்கப்படவில்லை என்றும் திருமாவளவன் தெரிவித்தார். SIR விவகாரத்தில் தேர்தல் ஆணையம் சார்பில் அனைத்து முடிவுகளும் ஒருமித்த கருத்துடன் எடுக்கப்பட்டதாக தெரிவிக்கப்பட்டுள்ளதே தவிர, எதிர்க்கட்சிகள் முன்வைக்கும் குறிப்பிட்ட குற்றச்சாட்டுகளுக்கு விரிவான விளக்கம் அளிக்கப்படவில்லை என்றும் அவர் கூறினார்.

மேலும், தேர்தல் ஆணையத்தை பாஜக தவறாகப் பயன்படுத்தியதாக இந்தியா கூட்டணி குற்றம்சாட்டி வருவதாகவும், இதுதொடர்பான குற்றச்சாட்டுகளுக்கு பாஜக மற்றும் அதன் ஆதரவு அமைப்புகள் விளக்கம் அளிக்க வேண்டும் என்றும் திருமாவளவன் தெரிவித்தார்.

SIR நடைமுறையின் மூலம் ஜனநாயகத்துக்கு பாதிப்பு ஏற்பட்டுள்ளதாக எதிர்க்கட்சிகள் குற்றம்சாட்டி வரும் நிலையில், இந்த விவகாரத்தில் ஜனநாயகத்தின் மீது நம்பிக்கை கொண்ட அனைவரும் கட்சி வேறுபாடுகளை கடந்து ஒன்றிணைய வேண்டும் என்றும் திருமாவளவன் அழைப்பு விடுத்தார்.

ஜனநாயகத்தைப் பாதுகாப்பது தொடர்பான இந்தப் போராட்டத்தில் பொதுமக்களும் கட்சி சார்பின்றி பங்கேற்க வேண்டும் என இந்தியா கூட்டணி சார்பில் வலியுறுத்தப்படுவதாகவும் அவர் தெரிவித்தார்.

Hindusthan Samachar / VINOTH KUMAR P