Tamil Nadu, 18 டிசம்பர் (H.S.)

வெற்றிமாறன் இயக்கத்தில் வெளியாகி மிகப்பெரிய வெற்றி பெற்ற ‘விடுதலை’ படம் மூலம் நாயகனாக அறிமுகமான காமெடி நடிகர் சூரி, தொடர்ந்து பல படங்களில் நாயகனாக நடித்து வருகிறார். ‘விடுதலை’ படத்தை தொடர்ந்து அவர் நாயகனாக நடித்த ‘கருடன்’ திரைப்படமும் வியாபார ரீதியாக மிகப்பெரிய வரவேற்பு பெற்றதால் சூரிக்கு நாயகனாக நடிக்க ஏகப்பட்ட வாய்ப்புகள் கிடைத்து வருகின்றன.

இந்த நிலையில், சூரி மீண்டும் கதையின் நாயகனாக நடிக்கும் படத்தில் அவருக்கு ஜோடியாக ‘பொன்னியின் செல்வன்’ புகழ் பிரபல மலையாள நடிகை ஐஸ்வர்யா லட்சுமி ஜோடியாக நடிக்கிறார். ‘மாமன்’ என்று தலைப்பு வைக்கப்பட்டுள்ள இப்படத்தை லார்க் ஸ்டுடியோஸ் சார்பில் கே.குமார் தயாரிக்க, ‘விலங்கு’ இணையத் தொடர் புகழ் பிரசாந்த் பாண்டியன் இயக்குகிறார்.

’கருடன்’ படத்தை தயாரித்த கே.குமார், அப்படத்தின் வெற்றியால் இரண்டாவது முறையாக சூரியை நாயகனாக வைத்து தயாரிப்பதோடு, ‘விலங்கு’ இணையத் தொடருக்குப் பிறகு இயக்குநர் பிரசாந்த் பாண்டியன் இயக்கும் திரைப்படம் என்பதால் இப்படத்தின் மீது எதிர்பார்ப்பு ஏற்பட்டுள்ளது.

Hindusthan Samachar / Durai.J